林宣妤準備回大馬做營養師拒同TVB簽長約與丁子朗秘戀一年恐告終？！｜頭號粉絲

林宣妤於《17年國際中華小姐》獲得亞軍而加入無綫，多年來深受無綫重用，曾參與《她她她的少女時代》、《使徒行者3 》及《反黑路人甲》等劇集客串演出，之不過早在今年5月就約滿的林宣妤，就傳出準備返回大馬做營養師，拒同TVB簽十年長約，從而揭出林宣妤原來同無綫最強小鮮肉的丁子朗秘戀一年，近日因此事而產生分歧。

撰文、圖片：東方新地｜編輯：八卦妹（原文刊於：東方新地）

林宣妤拒簽十年長約

有人辭官歸故里，亦有人漏夜趕科場，五光十色的娛樂圈，都唔係人人眷戀，就如《 16年國際華裔小姐》冠軍兼《 17年國際中華小姐》亞軍林宣妤（Serene），當選後一直備受無綫力捧，除了客串演出劇集《她她她的少女時代》，近期無綫兩部重頭劇《使徒行者3 》及《反黑路人甲》，林宣妤都有份參與演出，在《使徒行者3 》更被安排飾演林峯女友，是無綫點名力捧小花，雖然機會擺在眼前，今年五月約滿的林宣妤，與無綫拉鋸多時，最終仍決定不續約走人。據知情者透露：「當選華姐之後，無綫一路畀好多機會Serene，好似喺《使徒行者3 》，佢就演林峯女友，可以話係一個肯定受關注嘅角色，不過，拍咗幾套劇之後， Serene覺得自己唔係好適應娛樂圈嘅生活，加上佢家人全部喺馬來西亞，來港發展之後，佢一路都有思鄉病，所以上年底無綫一路傾佢簽長約留低發展，傾咗大半年，佢最後都決定唔續約，返大馬做營養師。」

22歲的丁子朗比林宣妤年輕一歲，兩人又同是選美出身，加上外形一個陽光一個清純襯到絕，早於去年初兩人已秘密撻著。

林宣妤和丁子朗的生日僅相差半個月，去年獲友人為他們一同慶生，情侶關係在友儕間早已公開，當時同場還有22歲星夢新人劉子碩（右一）。

因要返馬來西亞，林宣妤月中提早為本月30日生日的男友丁子朗慶生，丁子朗更在 IG開心 share女友送他的生日卡及人像繪畫，還留言寫道：「 Till we fly again」，並加上心心符號，表現冧爆！

已返大馬生活的林宣妤，日前在 IG po出近照並留言寫上：「 Life is too short to be mean to yourself ，so just do whatever makes you happy ！」寄語生命太短暫，不要待薄自己，要做讓自己開心的事！

與丁子朗去年初撻著

女友放棄留港發展，最唔捨得肯定是同林宣妤拍拖一年多的丁子朗，同是選美出身的丁子朗和林宣妤，兩人都是由外地返港發展，同聲同氣特別投契，去年初已經撻著，不過為免影響事業，二人有共識低調戀情，可惜蜜運情侶見解未能一致。據知情者透露：「Karl（丁子朗）梗係想Serene留低啦！如果Serene返咗大馬，真係唔知幾耐先可以見一次面，他亦同女友分析過，大家都仲年輕，如果想喺呢行做到成績，一定要揼啲時間，不過Serene就唔係咁睇法，佢覺得簽長約好困身，又唔捨得長時間同屋企人兩地分隔，不過最主要原因，都係Serene對呢行唔係咁大興趣，所以寧願返大馬做營養師！」林宣妤放下香港演藝事業走人，會唔會放下埋男友丁子朗？真係一個考驗！