4個恐怖心寒推理故事 你又可以估啱幾多個？

撰文：白仔丨圖片來源：影視截圖

4個恐怖心寒故事 你又可以估啱幾多個？

1.房間內的血字

大學嘅朋友小新3日之前過咗身，警察調查後指係自殺。身為朋友嘅我同小明就去咗佢屋企諗住同伯母打聲招呼，而且都上番炷香。上完香之後，我哋好奇心爆發想入去小新間房去一探究竟。我哋兩個用一個超爛嘅理由就呃過咗伯母，並且順利入到去小新嘅房間…

小新生前都好鍾意研究超自然同埋鬼神嘅嘢，所以成間房都充滿住唔同超自然嘅物件，好似啲相關書籍同埋電視機上面嘅巫毒娃娃，真係睇見都令人心寒！而最令人印象深刻嘅，就係一入去度門背後寫住嘅紅色大字：「REDRUM」（紅蘭姆酒），並且仲有小小腥味，當我哋再望向鏡入面嘅紅字後，就發現成件事嘅真相….

2.奇怪的電梯燈號

阿明今日自己一個半夜收工返屋企，佢入lift之後就如常撳番14樓，lift開始緩緩向上。突然之間8樓嘅燈號亮起，阿明心諗應該係8樓有人要搭lift啩。但下一秒佢即刻撳番G/F跑走咗…

3.屋苑姊妹仇殺案

小美患上咗抑鬱，佢嘅朋友介紹佢去搵非常出名心理醫生進行治療，喺醫生嘅查問下，終於發現小美係因為男朋友出軌導致佢有抑鬱嘅問題。而且呢個醫生只要捉住患者嘅手更加可以知道對方內心諗緊啲乜，所以佢就讀出小美內心嘅真正問題，發現佢唔可以再繼續同呢個男朋友落去。但係兩年之後，小美都係自殺死咗。小美家姐為咗搵出死因真相，而遠赴澳洲去搵番小美嘅心理醫生問話…

小美家姐：「醫生，到底我細妹係點死？」

小美家姐都知道醫生有讀心嘅能力，佢就握住醫生嘅手，想醫生話佢知答案。

但係醫生就答佢：「對唔住，其實我冇讀心嘅能力。」

家姐聽到之後好失望，喃喃自語：「到底妹妹係點死….」

4.殺手撕碎的遺言紙條

今日放學返屋企實在太攰，所以就直接攤喺床度瞓著咗。模糊中我發現媽媽畀人殺咗，然後爸爸係隔籬房同我講：「由美，你媽媽有咗第個男人，我同佢鬧交錯手殺咗佢。」

正當我醒番去隔籬房嗰時，發現咗媽媽親手寫但係畀爸爸撕成碎片嘅Note，我將3塊碎紙拼番好佢。

寫住：「由美？快啲走！爸爸，失去理智」

如果係你，你會相信爸爸定媽媽？

答案揭曉

1.注意故事最後提及嘅「REDRUM」同鏡呢兩個線索，「REDRUM」喺鏡入面睇就係「MURDER」。換句話來說，小新好可能係畀屋企人謀殺而死，而且呢一刻，都明白伯母點解會咁易畀你哋入去了…

2.如果真係有人喺8樓要搭lift的話，Lift入面冇可能會亮起8樓嘅燈號。即係….lift入面有除咗阿明以外嘅「人」

3.其實係家姐殺咗小美，而家姐為咗試探醫生知唔知道真相而去搵佢。當醫生握住小美家姐手嗰下就知道真相，所以佢講大話話自己冇讀心能力。

4.由美係一個人格分裂患者，媽媽喺由美另一個人格而殺。嗰張紙條係媽媽寫畀爸爸，正確拼法應該係「快啲走！爸爸，由美？失去理智」，字條嘅「由美？」後有問號係因為媽媽唔確定殺佢嘅係由美定係另一個人格。