跑步驚腳粗？「塑腿」3式完整教學，包你點操都唔粗！BY HIDY BOBO

上期教過大家如何食住瘦身，今日同大家探討另1個運動女生為之恐懼嘅問題：腳粗。事實上好多女生對跑步又愛又恨，皆因「愛美一族」做運動就係想維持美好身材，但如果跑到腳粗咪即係反效果？
其實，大家可以想像一下，大部分精英運動員每日都進行長時間訓練，過程必定比我哋艱辛10倍，但運動員鍛煉出嚟嘅肌肉線條都係細長緊緻，究竟係咩一回事呢？筆者跑步已有7個年頭，身邊都有唔少朋友問我到底有咩秘訣可以操極都唔粗，今日就同各位姊妹分享，如果你都想擁有修長結實嘅美腿，快啲學識以下「塑腿」3式，重新塑造更美更自信嘅自己！

第1式：最緊要正「姿」

每晚於緩步徑見到迎面而來嘅女生都有個小毛病，就係步幅偏窄而且緊促，以小腿作為主要嘅發力點，俗稱「雞仔步」。各位姊妹，下次跑步時，不妨留意下自己嘅跑姿，嘗試多用core muscles如腰、腹、下背等内部深層肌群嚟支撐上半身，以臀部、腿後肌群作驅動，保持穩定性，自然可以避免愈跑重心愈低嘅問題，大大減輕小腿負擔。

第2式：核心肌力core strength

想靚就唔好偷懶，假日安在家中都不忘要workout，其中1個我經常會做嘅練習就係Plank（棒式），唔需要特別器材同太多空間，相當方便而且好有效。
方法：背部、腹部、臀部同腳踭成一直線，先以雙肘撐地，雙手握拳腳尖着地，令身體呈一直線，雙腳同肩膀寬度一樣，要注意臀部唔好翹起或向下沉。進行時，保持正常呼吸，每組hold 30秒，每次3組。只要持之以恆，腹肌、臀股及四頭肌自然變firm！

內容延讀

＞【白波鞋大熱】2015年10對買到當你贏嘅NIKE白波鞋

＞女生瘦得有型3部曲BY HIDY BOBO

第3式：美腿由護理做起
唔好話男生係視覺動物，自問女生都鍾意睇靚嘢！邊個唔想有對索腿？其實跑步時肌肉會不斷收縮，如果冇好好護理，小腿就會慢慢變成蘿蔔。既然都花咗咁多力氣去做運動，千祈唔好因為一時怠惰，導致最後功虧一簣！記住做任何運動時都要熱身同收操，訓練前多做高抬腿動作，訓練後要伸展拉筋，紓緩肌肉，避免乳酸堆積。

除此之外，按摩亦係重要一環，貪靚嘅女生沖涼後一定會塗上潤膚露，提提你，唔好等身體全乾，最好就係喺充滿水蒸氣嘅浴室入面塗上潤膚露，立即鎖住水分同保濕，相比起着完衫、身體冷卻咗先塗，效果會好好多。而呢個時候最好一邊塗一邊按按小腿同大腿，介紹番以下兩個按摩方法，有助雙腿恢復完美線條：

1. 按小腿時將雙手由腳踭按壓至膝蓋後方，從下到上，重複10次。
2. 大腿則可用雙手手指公按住大腿前面嘅腿骨，從下往上按摩，同樣重複10次。

跑步「塑腿」不是夢！女生們別再猶豫，只要有恆心，想擁有完美嘅線條同緊致嘅美腿完全冇難度，立刻動起來，跑出屬於你嘅健康、線條同自信！

Hidy Bobo – 跑手/電台節目主持/Blogger

天生坐唔定，愛運動，尤其跑步，堅毅不屈的態度從這裏開始。跑步時候的我是最自由、隨性，一切回到原點，感覺自己確實地存在，用力地呼吸，盡情揮動汗水，從雜念生信念，憑着意念讓自己走得更遠。

2005–2006 Pacers Athletics Club
2008–2009 Watsons Athletics Club
2008–2009 City University Sports Team Committee
2009–2011 Glenhuntly Athletics in Australia

2013–2014 New Balance Excellent Ambassador

facebook: Hidy Bobo | IG: hidybobo

內容延讀

＞【白波鞋大熱】2015年10對買到當你贏嘅NIKE白波鞋

＞女生瘦得有型3部曲BY HIDY BOBO