素食跑團LightOness 跑者的衣食住行

咁喺收操呢兩日，各位跑手又有咩好做呢？筆者就搵嚟本地素食跑團LightOness，分享佢哋嘅「衣食住行」，以及作為跑者嘅態度。好多時，1種正確嘅態度比好成績更重要。渣馬過後，跑步仍然係要堅持，睇下你又會唔會喺LightOness身上，搵到值得參考嘅地方。
text – Lok（ig：loklokb1021） photo – Rover
LightOness facebook

衣。一體無局限
人靠衣裝，佛靠金裝，跑手就當然靠跑裝，今時今日，運動裝備同潮流元素已經不可分割，而LightOness亦完全冇任何局限，跑步時，會加上一啲潮流單品襯托，相反出街時亦會混合跑步裝備，打破「有fashion冇function」嘅傳統框框，更重要係佢哋用衣着凸顯隊形，令大家更團結，跑步時多1種動力。
另外，叫得LightOness，反光元素對佢哋嚟講尤其重要，所以，經常可以喺LightOness身上搵到「光」元素，而反光衣物本身亦有保護黑夜跑手嘅作用，一齊睇下團員嘅親身示範。

渣馬小貼士： 天文台預測，渣馬當日氣溫大概係15-18度，多雲可能有幾陣雨，不過朝早未有太陽或落雨，氣溫都幾凍，出門記得着多件褸，不過跑前就除底，keep住做熱身保暖，因為跑到出太陽會好熱，如果驚凍，有啲跑手就會着上便利雨衣，跑到熱就成件唔要，既方便又快捷！

食。心中有素

LightOness嘅幾位主腦成員都係素食者，而佢哋其中1個宗旨就係希望打破大眾對素食嘅誤解，用跑者自身行動去證明素食唔會令人冇力量、虛弱，亦唔會影響營養吸收，相反更會喺運動表現上有顯著進步，身體機能變得愈嚟愈好。聽落對跑手百利而無一害，大家不妨參考下佢哋嘅「跑素」餐單。

超級穀物Superfood

LightOness重要更正大家對飯後果嘅錯誤觀念，其實無論早午晚餐，都應該先食生果再進餐，身體先可以吸收。所以佢哋選擇以生果盤作為頭盤，尤其做完運動，跑手需要補充蛋白質以增加肌肉量，提升基礎新陳代謝。而蔬菜水果中，牛油果含有最豐富維生素，維生素E係超強嘅抗氧化物，能夠延緩衰老，令皮膚、頭髮、指甲健康漂亮。

今次LightOness所揀嘅餐廳，重點係食藜麥（Quinoa）—— superfood，藜麥就係蛋白質含量最高嘅食物之一，擁有11種必要胺基酸，營養價值極高，被聯合國確認為超級穀物，含有豐富膳食纖維、磷、錳同鐵，而且不含麩質，容易消化，近乎係完美嘅成分組合。另外豆類、果仁亦係素食者攝取蛋白質嘅來源，所以，食完以上呢幾道菜，包你身體狀況前所未有咁fit！

渣馬小貼士： 一定要食早餐，建議跑手於開賽前2小時食早餐，選擇易消化嘅碳水化合物如全麥麵包、饅頭等。亦唔好食得太飽，一陣跑到肚就唔好啦！

住。跑者部屋

講到「住」呢part，其實就係LightOness嘅「基地」，由於屋入面每個角落都放滿關於跑步嘅物品，於是筆者將之命名為「跑者部屋」。

「跑者部屋」對LightOness嚟講好似1個聚腳點，成員可以喺部屋入面「recover」，講緊唔止係跑完步之後休息，亦可以俾各成員放鬆心靈，由於LightOness各成員都從事創意工作，平時會約埋除咗一齊傾下跑步嘢，重會整下嘢食、玩下音樂，由成員變朋友，建立默契，正正係LightOness嘅團隊精神。

當LightOness要跑步時，又可以即時挑選裝備出發，無論心理同生理方面都幫到LightOness全體成員。

渣馬小貼士： 最好要有8小時睡眠，建議兩日前已經要提早上床時間，可能開賽前1晚會因為緊張而失眠，但瞓唔着都要令自己保持休息狀態。

行。與纜車競賽

最後，作為1個跑團，「行」呢part當然係講番跑步同練習，LightOness當中亦有成員參加咗今屆渣馬賽事，於是就同大家分享佢哋平時練跑嘅常用路線。

路線以位於德輔道中嘅NIKE Running Store作起點，出發後經長江集團中心跑到中環纜車站，之後沿白加道跑至纜車中途站，再跑上山頂凌霄閣做training，之後跑到柯士甸山道回程返起點。

路線來回全長約8公里，當中有大量短途上斜，跑步上斜時，每步大腿肌肉都要比跑平路時收縮得更強，需要高效率嘅心肺功能去支持，所以，可以同時鍛煉心肺功能，去到白加道51號（纜車中途站），亦可以利用樓梯做一啲鍛煉大腿肌肉嘅training，對於跑馬拉松最需要嘅耐力好有幫助。路程方面，中途間中會遇上纜車經過，跑手感覺就好似同纜車鬥快咁，有目的就更有動力，跑上山頂時，甚至可以俯瞰中銀大廈，夜跑一流。以上為LightOness對衣食住行嘅態度，唔知對同樣有跑步嘅你有冇啟發？