【2018世界盃 英雄人物】重視親情的球王 C朗的成長故事

撰文：理性足球分析｜ 圖片來源：Instagram、Facebook、網絡圖片｜編輯：隆仔＠central
內容由博客提供及授權轉載，不代表本刊立場。

C朗出生自葡萄牙豐沙爾區（Funchal parish of Santo Antonio），成長於貧窮嘅天主教家庭，爸爸為一名園丁，媽媽工作為廚師，C朗同佢另外3名哥哥姊姊需要共用一間房。

原來當年C朗媽媽（Maria Dolores dos Santos Aveiro）發現懷有C朗時，曾經一度想放棄呢個胎，最後當然仍決定生呢位足球巨星落嚟。C朗到而家仍然會同媽媽講笑：「雖然你當時唔想生我，但而家你見到我點樣幫你啦？」

當年7歲嘅C朗開始為CF Andorinha青年隊效力。因為C朗家境清貧，佢嘅隊友成日嘲笑C朗窮，當時爸爸為球隊打掃更衣室以賺取些微嘅人工。以C朗嘅性格，負面能量只會令佢更加刻苦訓練。

C朗曾經講過同爸爸（Jose diniz Aveiro）關係唔係咁好，無乜溝通。因為佢爸爸係一名酒鬼。C朗形容爸爸非常風趣，但只限飲醉酒嘅時候，爸爸大部分時間都處於醉酒狀態所以C朗好難同佢交心，認識嘅只係醉咗嘅爸爸，好似對真正嘅爸爸一無所知。C朗唔明白爸爸點解要沉迷於酒精，或者爸爸對貧困嘅生活非常不滿。

C朗20歲時，53歲嘅爸爸因為飲酒過度而去世。從此，C朗決定滴酒不沾。

喺世界盃對西班牙比賽入面為求勝利堅定嘅眼神話俾大家知C朗球場上情緒可以非常高漲，話你知C朗細細個已經係咁。14歲時C朗因為向一名老師扔櫈而被趕出校，因為老師嘲笑佢屋企窮。而C朗媽媽決定唔再送佢去讀書，相反鼓勵C朗發展佢鍾意嘅足球，當時C朗已經進入咗士呠亭嘅青訓。結果話俾大家聽，好明顯佢媽媽賭贏咗。

貧困嘅生活令佢變得好勝；從小承受無數嘅嘲笑令佢將無數負評轉化成無限動力；爸爸係酒鬼令佢只能依靠媽媽；缺乏父愛令佢當恩師費Sir為爸爸。

喺2003年，C朗正式加盟曼聯。

大家應該記得C朗初加盟曼聯時係幾咁獨食？個人主義，應傳唔傳，賣弄球技，淨係顧住自己嘅外表。加利仔曾經透露喺一場奧脫福嘅比賽曼聯贏緊4比0，面對門前機會作為曼聯球員應該把握射成5比0，但C朗卻賣弄腳法錯失機會。當時加利仔追住C朗嚟鬧:「你唔可以咁做，「佢」會記得你做嘅野！」

大家應該明白「佢」係指邊個。

當時雲尼史杜萊仍然喺陣中，訓練時「雲佬」多次表示唔可以再同C朗合作，因為C朗永遠唔會傳中：「我唔識點走位因為佢無諗過傳中」。因為雲佬習慣咗碧咸嘅長傳，當C朗擁有碧咸無嘅技術同速度時，自然做到比傳中更多嘅事。但當時嚟講雲佬係曼聯嘅當家球星，C朗嚟咗之後憑佢嘅花巧球技慢慢贏得球迷歡心，雲佬當然唔高興。

喺2005/06球季最後一場比賽對查爾頓前，雲佬同C朗終於出事。雲佬因為爭執踢咗C朗一腳，里奧費迪南當時為保護C朗輕輕踢開雲佬，點知雲佬一拳揮向里奧但里奧避開咗。之後查爾頓嘅比賽雲佬連後備都無，自此就再無為曼聯上陣過。

當然做出呢個決定嘅，係費Sir。

喺一場歐聯曼聯作客對賓菲加嘅比賽，係C朗自從加盟曼聯後第一次以英超球員身分番到葡萄牙比賽，以佢好勝嘅性格當然想用表現證明自己值得離開葡萄牙去英超搵食。結果，沉迷個人利益嘅C朗表現一無是處。

番到更衣室，費Sir當然向C朗開火：「你當你係邊個？你想自己踢晒？如果你繼續咁做永遠唔會成為專業嘅球員！」然後C朗流淚。其他隊友紛紛離開更衣室，里奧費迪南表示唔只費Sir覺得C朗需要學習，整隊曼聯隊友都覺得C朗需要成長。

C朗事後當然更加努力練習。

自此之後費Sir更加用心去調教C朗，每次比賽完費Sir都會指名C朗企出嚟，然後訓話：「點解當時你會選擇自己去而唔係傳中？」語氣當然唔係好。但每次訓話完之後，費Sir都會主動同C朗坐埋一邊，慢慢咁解釋應該要點做。

睇得出，費Sir對C朗非常有期望。C朗係特別嘅一個，因為費Sir從來無試過用同樣方法教導其他球員，係從來。曼聯隊友有見及此就攞呢段關係嚟講笑，取笑費Sir係C朗嘅爸爸，當然類似有啲奶爸咁嘅角色。

但對C朗嚟講，費Sir嘅教導的確影響佢一生，成就一代球王。

費Sir的確係C朗嘅再生爸爸。