專家推介：7大冬季Running Trails
一時之間唔知跑邊度好？我哋搵嚟香港數一數二、分別嚟自The North Face Team同埋Salomon Team嘅越野跑好手，推介咗7條佢哋嘅心水路線，照住建議跑又得，參考下亦得。不過要注意山上溫差大，要裝備好同埋做足夠熱身。
text-Jessie photo-被訪者提供、網上圖片
伸延閱讀：#teamadidas 紀嘉文 x Keyman 跑道上的歲月
「我係船灣淡水湖郊遊徑嘅忠粉，首次喺大美督經過，水壩可以去到郊遊徑嘅實際入口。全條路線景觀都好靚，雖然有啲上斜位幾難跑，但有好多長程可以跑嘅路段，係越野跑好地方。大部分路段都係一邊可以睇到船灣淡水湖，另一邊就係大海，而且重有啲位睇到印洲塘嘅壯麗景色。呢度係香港最隔離嘅路線之一，佢冇連接住道路或村落。而且漁農自然護理署冇再批任何賽事用呢條路線，所以大家可以盡情自己去嘗試探索。跑完18公里會去到烏蛟騰，之後跑多約6.5公里，一直經新娘潭、八仙嶺自然教育徑就可以返到大美督。」
曾小強 profile
第1次參加越野跑賽事「動感亞洲越野跑步賽」就奪冠，曾獲2007年毅行者冠軍、2008年橫過戈壁沙漠 「Racing The Planet 」賽成為首位殺入3 甲嘅華人，更曾多次奪得香港「山野之王」殊榮。
雞公嶺
起點：元朗逢吉鄉
終點：林錦公路林村
路線全長：5公里
「地點方便容易去，路線沿途都可睇到好靚嘅風景，喺山脊上面跑一望無際，兩邊都睇到城市景色。好近內地，可以清楚咁望到深圳。全條路線都好天然，全程都冇實際路線。喺嗰度可以欣賞到好靚嘅日落，環境好寧靜，特別係夜晚，可以好好享受喺大自然下跑步嘅感覺。」
黃浩聰 profile
任職消防員，曾參與多個越野跑賽事，剛奪得The North Face 100越野賽男子100公里組亞軍。
九逕山
起點：大棠黃泥墩村（K66巴士總站和大棠小巴總站）
終點：大棠村
路線全長：10公里、25公里
小圈10公里（紅點）：由黃泥墩村出發，喺黃泥墩水塘公路右轉走到盡頭，沿天然山路一直上到山脊，轉左一直沿山脊走，見到黃泥墩水塘，落山就會見到神秘小水池，再沿路落黃泥墩村。
大圈25公里（黑點）：由黃泥墩村出發，喺黃泥墩水塘公路右轉走到盡頭，沿天然山路一直上到山脊，轉右沿山脊跑200米，落洪水坑灌溉水塘，過橋跑5公里極之崎嶇嘅山路上九逕山，折回大欖桶水塘，沿毅行者路線跑到大棠燒烤場，落大棠村。
「九逕山連接元朗、藍地、屯門，換句話講，穿過呢座山就可以去晒3個地區。山上小徑非常天然，完全冇經修葺，而且上落差大，非常適合用作山路技術訓練。而且山上路徑非常多，我規劃嘅只係常規訓練路線，其實鍾意點兜都得。上到山脊可環觀整個新界西市區面貌，洪水坑灌溉水塘、九逕山發射站亦係值得一去嘅景點。由於路段崎嶇難走，山上極少有人經過，可感受到大自然嘅寧靜，但同時要注意安全。」
羅楚健 profile
2000年首次參加毅行者100公里比賽，開始全身投入長距離越野跑。2013年成功入圍被稱為「Toughest Foot Race Of The World（世界最艱辛跑步比賽）」嘅美國惡水超級馬拉松。
龍門郊遊徑
起點：大帽山郊野公園川龍
終點：菠蘿壩
路線全長：5公里
「路線途中會經過3條木橋，係有關部門為避免遊人涉澗時危險，專登搭建橫跨澗上，好有特色。而且沿途可以俯瞰荃灣、青衣一帶景色，重可以遠眺汀九及青馬大橋。當愈接近城門，就會愈多林木，如果季節適宜，可以見到好多雀仔同埋蝴蝶。抵達終點後，更可順道參觀城門遊客中心及菠蘿壩自然教育徑。呢條路線慢跑一流。重有個小小推介，好多人喺川龍起步前，都會先去距離兩公里嘅川龍村，嗰度有間出名用山水沖茶同有得食地道西洋菜嘅中式茶樓，歎完先至開始起步。」
元荃古道
起點：荃灣西鐵站
終點：深井
路線全長：10公里
「我個人認為元荃古道風景最靚嘅地點係喺石龍拱，因為嗰度視野廣闊，可眺望汀九橋、青馬大橋、汲水門大橋3橋並立嘅美景。由荃灣柴灣角出發至田夫仔嘅一段元荃古道，終點設喺深井，咁樣安排路線，可節省路程，亦可順道去深井食燒鵝，重可以減咗田夫仔至元朗大棠嗰段沉悶林蔭路。不過，如果想跑晒成條元荃古道，就要由柴灣角出發，一直跑到去大棠南坑排村，三五知己一齊跑都唔錯嘅。」
「先喺漁光道體育館出發，經香港仔水塘道、香港仔樹木研習徑、金夫人馳馬徑、港島徑第四段（逆走）、香港仔水塘道（下斜），返到漁光道體育館。逆時針方向繞香港仔上水塘跑1圈，折返起點。路線嘅起點同終點都設喺體育館，方便寄存衣物同跑後沖涼換衫。有幾條路段都係天然越野泥路，令腳部壓力減少，而且上落幅度唔大，適合初跑越野人士。」
小西灣至大浪灣
起點：小西灣運動場
終點：小西灣運動場
路線全長：8公里
「跑步路線由小西灣運動場起步，沿海濱長廊、小西灣海濱花園、龍躍徑、歌連臣角道、砵甸乍山郊遊徑，到大浪灣，之後原路折返。路線位於港島區最東，山勢高昂、開揚，而且面向太平洋，係晨跑觀日出嘅好地方。喺小西灣慢跑呢條路線去大浪灣，只需40分鐘，相信較慢嘅都可於50至60分鐘到達。路程雖然短，但有斜路、樓梯同埋越野路，所以係條具難度嘅短程路線。」
