有心唔怕遲 「超齡」F1車手方駿宇

Adderly 14歲先開始真正「入行」，比起好多外國車手4、5歲就開始接觸賽車遲好多，但憑住佢嘅毅力，多年嚟佢參加多個比賽，平均都得到好成績，今年更得到英國蓮花F1車隊（Lotus F1 Team）賞識力邀加盟，成為香港首位F1實習車手。
有心，的確唔怕遲，但至緊要夠快（手車）。

text – Jessie photo – Rover、由被訪者提供、Lotus F1 Team、資料圖片

方駿宇Profile
香港首位F1實習車手。生於1990年3月2日，14歲參加保時捷所舉辦嘅活動日（Track Day）開始接觸跑車，之後開始接受訓練。2013年贏得Audi R8 LMS盃年度總冠軍，成為該賽事中最年輕總冠軍。上年10月22日正式落場進行F1車手技術測試，駕駛沙巴車隊（Sauber）2012年戰車C31完成99圈。1個月後，喺F1阿布扎比站正式為車隊練習上陣。

承受身體5倍重量
訪問當日Adderly揸咗佢部愛車GTR出嚟，多次極速來回俾我哋拍攝，但Adderly仍神態自若，佢話揸街跑同F1根本冇得比，唔識賽車嘅人以為揸賽車只需反應快，其實F1對車手嘅體能需求好大。

Adderly就話：「一般成人正常心跳速率係每分鐘60至100下，賽車時轉急彎，心跳可以去到每分鐘190以上，比急速跑步重要高好多。假若以時速250公里掟彎，車手就要承受等同於自己體重5倍嘅力壓向自己，如果身體唔夠fit，血上唔到腦就會暈低失去知覺，十級危險！」

50度高溫下比賽
Adderly話，佢哋平時做體能訓練，如心肺功能係基本功，尤其心臟要夠強，喺轉彎時先可揼啲血上腦。「重會針對頸、背脊、前臂、小腿肌肉加強訓練，甚至pat pat肌肉都要練，因為賽車時要100%控制到自己身體，特別喺轉彎時，要hold住身體同軚盤，扭得爭少少已經可以發生嚴重意外。重要練速度、手同眼嘅協調、平衡力。亦要有高EQ，喺個心狂跳下點樣仍可專注。同埋賽車時喺軚前有好多掣要撳，就好似一路揸快車一路玩緊《WhatsApp》咁。」
除咗鍛煉肌肉控制能力，抗熱能力亦好緊要，Adderly話賽車手嘅裝備，除咗頭盔，重要着3層防火衣、防火鞋、防火襪、手套，重有HANS（Head And Neck Support）用嚟卸力保護條頸。「當出面30度氣溫，方程式車廂內可以有50度，再着住咁多衣物。揸賽車就好似舉重咁，因為要用好大力嚟控制軚盤，而踩break都要80公斤力，加上車手長期處於高溫中，絕對係對身心最大挑戰。」

內容延讀：

香港首個 美少女戰士20週年時裝企劃

《大時代》金句 你識幾多先？

初次落場冇好感
Adderly 15歲正式嘗試揸方程式，但佢話對方程式賽車絕對唔係「一見鍾情」。「真正落場練習前，我以為自己有打開機，已大概知道賽車原理，一開車，嘩！成個醒晒，心諗乜原來係咁難？連只係想部車行直線都好難，因為揸方程式車時，車手個頭係凸出嚟嘅，風會好猛烈咁撞落頭盔度，開到時速200幾時，個頭會係咁搖，頭盔被風吹到扯向上，睇唔到路不特止，重會呼吸困難。」
Adderly話足足用咗成年，先練到條頸夠力同習慣勉強頂到1場比賽。「第1次揸方程式車時，體能根本應付唔到，第1次感受G-Force（用嚟量度車手喺移動同改變切線，或加速同減速時身體承受力道嘅單位），揸完成個人散晒，重撞爛晒部車，又點會有好感？」

轉捩點係Adderly嘅教練同爸爸。「當時訓練班係連續嘅星期五、六、日，第1日撞爛晒部車後，第2日我又冇事咁跳上另1部車繼續揸。教練就同我爸爸講，你個仔唔驚撞車，都有天分，可以繼續玩喎。爸爸都覺得既然我咁鍾意車，就不斷鼓勵我繼續揸。」

愈玩愈高級
Adderly當時逢星期四都要去珠海練車，學校唔鍾意佢成日請假，但佢得到爸爸支持，可以繼續堅持。1年後，佢16歲就參加咗人生第1個比賽：中國雷諾方程式錦標賽。「齋練車好悶，我想進步就一定要比賽，學起步、暖軚、點樣扒頭等等。賽車輸嘅時候好多，就更珍惜贏嘅感覺，於是愈嚟愈有興趣，就更努力揸得更好。」
自此之後Adderly多次比賽，愈比愈高級。上年年中，佢被F1沙巴（Sauber）車隊邀請到西班牙試車。「當時F1沙巴（Sauber）車隊同蓮花F1車隊共同租用場地，我就幫Sauber試，另1位車手為蓮花試。我試車時冇出現任何事故，速度都OK，跑咗400公里後，就獲得FIA Super License嘅超級車牌，即係可以賽F1嘅認可資格。到11月再去到F1賽尾站阿布扎比，揸Sauber嘅2014年新車，為佢哋車隊嘅車手練習試圈，從而制定之後比賽嘅策略。」而當時Adderly亦成為第1位揸F1車落場嘅香港車手。之後因蓮花F1車隊早喺西班牙時已見過佢，而車隊高層覺得Adderly嘅表現好過佢哋嗰位試車年輕車手，因此就邀請佢加盟。Adderly話當時認真評估，蓮花F1車隊嘅車轉用平治引擎，而平治引擎係上年嘅世界冠軍，所以就揀咗同蓮花F1車隊簽約。

內容延讀：

【氣質美女】2015你要識嘅女生 中條彩未

密實姑娘 綾瀨遙

目標：世界冠軍
今年3月，Adderly正式同蓮花F1車隊簽約，成為香港首位F1實習車手，咁究竟要幾耐先可以脫離「實習生」正式落場呢？「今年同下年我會用多啲車隊嘅模擬器練習，即係好似打機咁揸賽車，從而提供數據幫佢哋研發車隊嘅新車，呢啲都係實習車手要做嘅嘢。其實今年我除咗擔任蓮花F1車隊實習車手之外，重會為Koiranen GP出戰GP3系列賽，同為賓利車隊（Bentley Team）出戰亞洲GT系列賽。如果有好嘅成績，都同樣可以加速我成為正式賽車手嘅時間，但具體時間就因人而異。」
問到佢有咩短期目標？佢答得好快：「世界冠軍，講完！」再配以1個得戚樣，非常搞笑！「講笑啫。短期目標始終係要快啲成為F1正賽車手。其實而家啱啱開始都學到好多嘢，好似上個月去F1上海分站，最難忘係首次到賽車場就要認識車隊近50人，包括車手、引擎工程師、空氣動力學工程師、車架工程師、策略師、比賽工程師同機械師等等，重同佢哋一齊到賽道『踩場』（track walk），心情好興奮，希望將來可以繼續學習，繼續進步。」

內容延讀：

《狐忍》再連載！ 劇情大解構

威到冇朋友！MINIONS有專屬黃色