《New Monday》跑步影像企劃 Run2Connect「父女篇」~絆

We Run To Connect。
長野知生（Nagano Chikao）係1名移居香港廿幾年嘅日本商人，而女兒長野邑香（Nagano Yuka）於香港土生土長，但日語依然係2人嘅母語，為到令邑香易於融入香港呢個既熟悉又陌生嘅環境，長野先生就開始帶同邑香一齊
跑步，從而展開兩父女嘅跑步人生。
「絆」，代表2人之間嘅1份深厚情誼、1份聯繫。
長野父女透過跑步，從此建立出無形卻深厚嘅感情，聯繫彼此。

父女の絆
「女兒是父親的前世情人」，因疼愛，變作緊張，更成為嚴厲。父親嚴厲嘅態度，漸漸成為女兒與父親溝通嘅壓力。
邑香第1個跑步比賽，玩票性質下，喺100位選手中取得第6名佳績，得到跑會教練嘅賞識，開始專業訓練。由呢刻開始，父親與女兒角色對調，由當初女兒陪伴父親，轉為父親擔當「陪跑」重任。
對於當時只有9歲嘅邑香，高強度訓練絕對唔輕易，更萌生放棄念頭。作為父親，感到心痛嘅同時，亦唔想女兒斷言放棄，更希望邑香喺過程中學識堅持。人生如同 跑步，有高低起跌，但只要你唔停，困難嘅路總會過去，始終會成功衝線。不久，跑步成為兩父女專屬嘅溝通方式，並成為父親對女兒嘅支持及鞭策。

重溫延讀：

＞跑步影像企劃 Run2Connect「抗病篇」~延

＞跑步影像企劃 RUN2CONNECT「失明篇」~前

＞跑步影像企劃 Run2Connect「情侶篇」~二

父女の成長
儘管如何疼愛，都離不開某天，女兒放開父親嘅手，追求自己嘅一片天。
望住女兒跑得愈嚟愈快，超越自己，身為父親，百般滋味在心頭，一方面為女兒進步而高興，另一方面對孩子長大感到「無奈」，明白到女兒總有離開自己尋找理想嘅1日。但只有緊隨女兒嘅身後，邑香先唔會發現父親滿足嘅笑容，唔會自傲，更可以無憂無慮向前奔跑，因為佢清楚知道，身後有個強大嘅後盾，默默咁看顧及保護自己。雖然於步速上嘅距離愈嚟愈遠，但父女間嘅關係卻愈見親密，產生出無形嘅默契。

父女の夢想
「我想參加2020嘅東京奧運，做個全職嘅跑手！」
當邑香講起呢個聯繫世界嘅體壇盛事，稚氣嘅樣貌流露出興奮堅定嘅眼神。而呢日，亦同樣係父親嘅夢想。邑香抵抗得到實現夢想前，無數嘅誘惑同藉口嗎？「我絕 對唔會放棄跑步，更唔會放棄夢想！因為唔單止係放棄咗個機會，更係錯失咗俾自己成長及發展嘅過程，所以我會繼續努力。」長野父女之間嘅「絆」就係透過跑步 緊緊相扣，每次比賽都係大家一齊努力嘅證明。

 
重溫延讀：

＞跑步影像企劃 Run2Connect「抗病篇」~延

＞跑步影像企劃 RUN2CONNECT「失明篇」~前

＞跑步影像企劃 Run2Connect「情侶篇」~二