聖誕節5大約會女朋友/女神中伏位（另加男朋友/兵仔加分攻略）
撰文：eun｜圖片：電影《Filth》、《500 Days of Summer》、《Mr & Mrs Smith》、《Nightcrawler》、《Her》劇照、新傳媒資料室｜編輯：乖乖l（原文刊於新假期）
聖誕節5大約會女朋友/女神中伏位
1. 無預約餐廳
其實大家都心知肚明，所謂聖誕節大餐，只係平時Menu轉一轉個名，再收你Double價錢，不過難得一年一次，就算幾唔願意被人劏都好，男朋友或者兵仔點都要預約定餐廳。食聖誕大餐嘅重點係情調，食物只係其次。假如聖誕節都無預約好餐廳，即使你女朋友或者女神唔係港女，點都會有少少唔開心。假如兵仔喺呢部分做得好，甚至可以做到投其所好，一早留意女生喜歡食的菜式，預先Book定女神鍾意食嘅餐廳，話唔定從此可以退役。
2. 聽唔出女朋友／女神真正嘅意思
其實唔少女性都係口是心非，當你問佢：「想收到咩禮物啊BB／女神？」大部分都唔會直接講出答案，又或者叫你唔使送。當你以為真係唔使送聖誕禮物嘅時候，少年，你太年輕了！其實女性唔直接講出答案，當然就係想你估吓佢嘅心諗緊咩，假如你估得中，又送得啱禮物的話，女朋友自然會覺得你十分了解佢；而女神當然對你嘅好感提升，甚至暗地裡加分。
3. 送錯禮物
其實送禮物係一種學問，首先你要了解收禮物對象需要啲咩、喜歡的牌子、款式，亦要考慮禮物的價錢及實用性。假如只係單方面從自己角度出發，送出認為「對方一定好鍾意」嘅禮物，隨時半隻腳踩入陷阱。所以作為男朋友或兵仔，當然要打聽一下女朋友或者女神的口風，假如最近對方話銀包開始爛，你要識做呢！
4. 求其影相
在打卡至上的年代，唔少女仔都喜歡到不同地方影相打卡留念。再加上聖誕節咁多商場布置，就更加要影多啲相Po上IG呃Like啦！要幫女朋友／女神影靚相，當然唔可以求其影啦。要影一張靚相，絕對唔係咁易㗎葉師傅！
首先，你要做好無限影嘅準備。
第二，要準備好照片的構圖，唔好有其他閒雜人喺張相度出現。
第三，要低炒，影到女朋友／女神的長腿（無論佢有冇一對長腿）。
第四，要捕捉到女朋友／女神最漂亮、最甜美的一面。假如你影相影得靚，兵仔話唔定可以有下一次出街嘅機會，又可以同女神增進感情！
5. 大時大節無表示
即使你做錯以上4樣其中一樣，我諗女朋友／女神最多都會有少少嬲同唔開心。但如果你大時大節都無咩表示，例如：唔諗慶祝節目，甚至乎唔約女朋友出街，咁你可以執定包袱喇，下年吸取今年經驗啦朋友！仲未諗到買咩送畀對方，咁就要睇埋下文，睇吓有無心水禮物喇！
遇上心儀對象要點追？
唔同女仔追求嘅方式都唔同，如果用錯方法就可能食「檸檬」，熟讀媾女攻略令你事半功倍！如果女生唔想太主動，在心儀對象面前散發出女人魅力，自然能俘虜男神的心。最後要開始一段戀情，當然唔少得表白，切勿犯了這幾個表白禁忌，令你前功盡廢！
如何保持戀情熱度？
情侶的關係是雙向的，不論男女都應學識這套「情侶相處十二式」。情侶拍拖時亦可以互相做一些情侶間甜蜜小行為，為關係保持新鮮感。當然一段感情沒有可能永遠都處於熱戀期，想分清男朋友是愛你還是鍾意你，即從這5件事分辨出來！
