Anson Lo新歌《不可愛教主》谷肌出浴贈「神徒」 網友猜想MV內容：延續田牧故事？！
撰文：八卦妹｜圖片來源：Anson Lo《不可愛教主》截圖
Anson Lo（盧瀚霆）化身「阿牧」 唱出單戀心聲
超人氣男團MIRROR早前就在官方社交網上宣布，今個暑假期間，每週推出一首全新單曲，其中憑劇集《大叔的愛》而再度人氣急升的盧瀚霆（Anson Lo）昨日（7日）率先打頭陣，推出年度第二首個人歌曲《不可愛教主》，實行變身「阿牧」訴說單戀故事。提到新歌《不可愛教主》在26歲生日當日面世，暖男Anson Lo笑言新歌是「特備禮物」：「呢首歌唔係送畀自己，而係送畀神徒嘅生日禮物。上次出歌已經係一月尾嘅事，所以好想喺生日正日，同fans有一個遙距嘅共同回憶。」
新歌《不可愛教主》亦是《大叔的愛》片尾曲，Anson Lo就表示《不可愛教主》是從劇集角度出發，記載著「阿牧」的心路歷程：「監製Tommy希望片尾曲由『阿牧』去唱，唱出佢對阿田嗰份不求回報嘅愛；填詞人林若寧亦都喺大家嘅戀愛角度出發，因為每個人都試過掛住一個人、甚至單戀，明知對方唔會鍾意自己，仍然奮不顧身去守護佢。相信聽到呢首歌嘅朋友，心裡都會浮現出一個好想見嘅人；同埋『教主』呢個稱號，我覺得只要你鍾意嗰個人，佢就係你嘅教主。」
Anson Lo（盧瀚霆）與陳漢娜貼身共舞感緊張
過去曾為《一所懸命》、《EGO》等歌曲拍攝MV，經驗豐富的Anson Lo卻透露新歌《不可愛教主》是屬於全新體驗：「出道以嚟我嘅三首solo作品都係跳唱形式，MV一定同跳舞有關，但係今次採取全劇情式拍攝，我諗fans同觀眾都會幾驚喜，見到一個唔同嘅Anson Lo。」
為配合歌曲設定，團隊特別邀請到陳漢娜（Hanna）擔任MV女主角，不過Anson Lo坦言自己感到十分緊張，更自爆為MV獻出「第一次」：「人生第一次拍MV有女主角，最難忘係同Hanna頭貼頭嘅場面，因為喺我嘅演藝生涯中，第一次同女主角有咁貼身嘅接觸，當下真係好緊張！排戲時都有啲尷尬，但係拍攝當日，我感覺到Hanna嘅專業，每一個機位佢都做到100%；佢亦為咗MV專程學舞，真係好辛苦佢。」
Anson Lo（盧瀚霆）掌上壓急救肌肉
除了與Hanna唯美共舞，Anson Lo還在MV中突破尺度，大晒結實胸肌，實行向「神徒」派糖！對此他亦直認：「今次有啲鏡頭比較大膽，例如露背肌、甚至沖涼，對我嚟講算係幾大尺度！最近無乜時間操練，演唱會後只係做過兩次gym，真係好驚冇嘢畀人睇，所以拍攝展示身材嘅場面之前，我就不停做掌上壓，埋位前都要做多幾下。」
對於《大叔的愛》引發全城熱話，Anson Lo坦言感激觀眾支持，亦視劇集為演藝事業中的一個標志：「我覺得《大叔的愛》係一個里程碑，睇到自《男排女將》之後，自己有乜嘢唔同嘅改變。見到大家鍾意《大叔》同「凌少牧」，真係俾咗我好大信心。」與喜劇有緣的Anson Lo亦透露，首部主演電影《假冒女團》有望在今年上映，期待為觀眾展現不同面向。
網友猜想MV內容：延續田牧故事？！
Anson Lo自新歌《不可愛教主》MV推出後，就在其社交網上發出限時動態，不但感謝歌迷、網友的支持，同時問大家覺得MV的故事是甚麼：「大家在MV留言區告訴我，你們看完之後覺得MV故事代表什麼？」並表示數天後就會公布故事劇情及歌名的意義。
有不少網友看完MV後各有評論，但當中的小丑魚卻是大家都覺得是重要提示的一環：「nemo小丑魚 (象徵阿田) 係少有會變性嘅魚, 當魚群入面無雌性小丑魚嘅時候, 雄性小丑魚就會變成雌性, 以延續族群生命。」、「淨係聽歌嗰時已經覺得心痛，係暗戀單戀苦戀嘅感覺，睇埋mv 更加痛同埋教主俾hanna差啲錫同攬住嘅時候，嗰種不知所措嘅感覺拿捏得好好！ Btw 浸浴嗰幾幕其實唔係好需要，但明顯係教主大派福利」
