死屍死時四十四｜何爵天導演專訪6大要點 戲名係特登咁繑口？！（有劇透）
《死屍死時四十四》︳電影名故意咁繑口！
唔少人對於《死屍死時四十四》的電影名都感到疑惑，認為改得相當繑口，唔係咁易記同讀。何爵天導演就表示呢個名係由編劇「Mr. Pizza」同埋錢小蕙所諗，而因為「Mr. Pizza」對似呢種似急口令或繑口的電影似乎略有鍾情，就如《那夜凌晨，我坐上了旺角開往大埔的紅VAN》就可見，所以《死屍死時四十四》有玩味得嚟又帶到故事的主題，就故此用作為電影名。
《死屍死時四十四》︳大讚毛姐係一位「整體性」的人
何爵天導演訪問中大讚毛舜筠毛姐真係用心幫咗套電影好多，指佢係一個唔止諗自己，而係諗「整體性」的人，為咗電影效果更好，放棄自己個人表演的時候，要求搵埋其他演員共同演出。
《死屍死時四十四》︳發揮演員的不同面向 黃又南原來係體力擔當
唔少觀眾都大讚今次電影所有的角色都做得好好，睇得出佢哋每個角色都有用心的角色設計，由《正義迴廊》開始就睇得出演員真係「有戲可演」。何爵天導演就指想展現出演員不同面向，同埋帶出有別以往的一面，所以喺《死屍死時四十四》會首次見到余香凝拍喜劇、鄭中基會有鐵漢柔情的一面、毛舜筠係咁講粗口、黃又南首次做人老公等。何爵天導演仲大爆原來黃又南今次的安排係一位「體力擔當」，因為有好多移屍的場口，黃又南係出得最多力最辛苦的位置。
《死屍死時四十四》︳用心製作電影 大玩時空交錯
《正義迴廊》打破四面牆、超越空間限制的拍攝為人熟悉，今次《死屍死時四十四》同樣再次展現，唔少觀眾都感受到何爵天導演當中的用心製作。何爵天導演訪問中表示「電影」的界線係可以好寬，就係應該試多啲唔同玩法！
《死屍死時四十四》︳最後草地一幕原係咁解？！
電影去到最後毛舜筠、鄭中基、呂爵安、黃又南等人一齊去到一個遼闊的草原埋咗條屍，唔少觀眾都留意到嗰個畫面係特別唔同。何爵天導演親解當時呢班人係穿過一個霧，就連背景音樂都所不同，想營造出佢哋去到一個無人又遼闊的地方，如同「仙境」，終於可以放低自己現實中所面對的問題，如佢哋最著重的嗰層樓同埋佢哋日常的問題，所以喺埋屍時盡吐心中苦水。
《死屍死時四十四》︳蜜蜂代表「共業」
有關《死屍死時四十四》最後結局係因為「蜜蜂」而搞出嚟的鬧劇，何爵天導演就表示呢個結局的蜜蜂設計係代表「共業」的意思。原因電影一開始就交代到佢哋層樓有蜂巢的問題，但眾人都唔去理會，唔去處理，最後自食其果。
《死屍死時四十四》︳同場加映 嚟緊想拍籃球戲！
啱啱金像獎拎咗「最佳新晉導演」的何爵天導演被唔少觀眾睇好，亦期待佢下一套作品，何爵天導演就表示下一套想拍一套有關籃球教練的電影，都係一套群戲，因為佢的畢業作品《Foul》都係一套講教練與球員的矛盾，兩代之間的矛盾，所以想再拍類似的電影。
《死屍死時四十四》劇情講述什麼？
《死屍死時四十四》的故事係講「一棟大廈。一班業主。一條屍體。一晚。盡地一煲。」，反映香港樓價以及香港人面對買樓的態度問題。電影雖然係講「業主為咗自己層樓而搬屍體」的荒謬故事，但卻又如此貼地反映香港人正正面對樓價的問題，唔少港人仍努力上樓上車…詳情請看
