【Kobe】極光以外的一些事@Tromso

多數人去Tromso會搭內陸機，建議落機後乖乖搭巴士到市區就算，因為的士要預約。十數分鐘巴士車程每人盛惠約50港元，所以記得用心搭。可能司機見我大鄉里，主動搭訕介紹Tromso，話當地人覺得Tromso主島似條沉睡海中的三文魚，小山是突出的魚鰭，感覺就如中國似隻雞或者香港有靈龜差不多。

途中司機又介紹當地另一特色–隧道，其實更應該說是隧道網，深藏Tromso海中及幾座小山之內，隧道網共有7個出口，3個迴旋處，型到爆。之後搵資料發現唔止得我一個咁娘，有外國遊客更專登再揸車去拍片(http://www.kiwitz.com/tromso-tunnel)。司機話Tromso山石夠硬，可開闢隧道網絡，歐洲少有，既然車費唔平記得望多兩眼。

說實話，市中心真正有趣的景點不多，旅遊書推介的博物館就不說了，但旅遊中心附近有間座落內園的玩具店，地方不算大，但貴精不貴多，同行「奄占」朋友竟有戰利品，所以不妨看看。同區亦有座140年歷史的啤酒廠，本人好酒，鍾意睇酒廠，但之前睇過幾次所以無去。不過，酒廠應比博物館有趣得多。

離開市中心選擇多好多，11月中後鯨魚游回來，可以出海觀鯨；12月起可坐雪橇犬拉車，我就選擇去湖邊騎馬。有別於一般旅遊區行貨邊騎10分鐘，今次接待我們是一位馬場女主人，她飼養近30匹馬。馬主深愛馬匹，明知當地馬匹不值錢，養一匹蝕一匹，都堅持經營並愈養愈多，所以要搞騎馬遊幫補一下。

女馬主咁堅持，對我們當然亦有要求。到馬場後她逐一介紹場內大小馬兒，要我們餵馬食草，打打交道。選好馬匹就要我們入馬廐與馬兒相處，幫牠們刷毛。其實馬好親人，又聽話，同牠們Friend了後就可出湖邊騎馬散步。可能馬主見我們對馬兒不錯，傾傾下收起了初時的冷漠，無計時間之餘，更請我們到她家中吃挪威傳統甜點，又車我們到附近民居、學校、地標四周看看。

其中，她帶我們到著名景點Arctic Cathedral(即瞬間看地球經常見到那座)。與旅遊書相比，馬主口中的教堂另有一番故事。馬主話教堂設計仿傚突出水面的冰山，而據稱設計師唔滿意雪白的教堂另一面竟被裝上傳統教堂彩色玻璃幕牆，一怒之下完工後唔肯再回去。去旅行融入當地真係好緊要，識番少少吹水技倆傍身就更Good。

如果天氣好，Tromso極光無得輸。

司機知我想影相，已主動減慢車速，但隧道內真係幾暗。

間玩具店未稱得上隱世，但絕對值得去睇睇。

俾面在140年歷史，Mack’s 啤酒廠應該都值得一遊。

我幫佢刷毛時俾佢踩了一腳，馬主問我仲Feel唔Feel到自己隻腳趾，如果仲Feel到證明馬兒無心，因為有心起出來可以踩到即時瘀。

湖邊景況真係一流，但騎了個幾鐘，真係有點凍，自行投降。

教堂另一邊裝上彩色玻璃幕牆，馬主話就因為咁設計師唔肯再回去。

text-Kobe Wong

曾任職財經傳媒十多年

主理嘗滿‧SatisFactory私房菜兩年多

熱愛烹飪、熱愛旅遊、熱愛分享生活

識煮幾味又愛去旅行，同大家大雜燴分享一下

廚娘‧遊雜貨店facebook

內容延讀：

【Kobe】天佑新西蘭

>>LIKE我們fb<<<
www.facebook.com/newmonday.com.hk