15件你唔知嘅李小龍趣事

今日係龍哥李小龍74歲大壽，雖然佢離開咗我哋41年，但佢打不死嘅精神仍然活喺我哋當中。近排香港七國咁亂，市民情緒低落，就更需要龍哥精神幫我哋振奮士氣。大家都知道龍哥幕前幕後都好打得，但以下有關佢嘅趣事，大家就未必知﹕

Text-東

內外都追求完美嘅龍哥其實好貪靚，啲衫幾乎全部訂造，佢亦係Gucci袋嘅忠粉，大家睇下個Gucci袋上刻咗龍哥英文名「Bruce Lee」嘅縮寫BL。

除咗衣着打扮，龍哥亦好鍾意玩相機同跑車，佢先後揸過唔少名車，好似保時捷同Benz，圖中係佢嘅愛駕，紅色Benz 350SL。

講到衣着，大家都知龍哥喺《死亡遊戲》着過對疑似嘅Asics Tiger，點解係疑似呢？因為有研究李小龍嘅專家就話雖然龍哥生前的確最愛着Asics Tiger同Adidas，但《死》片中佢曾着過兩對黃色運動鞋，都非Asics Tiger。

講開又講，身高5呎7吋半嘅龍哥對腳非常細，佢着7號半鞋。

除咗細，佢對腳重係超級扁平足。龍哥重有五百幾度近視，平時佢戴嘅黑超全部係近視鏡。龍哥嘅中學同學黃霑，曾大爆龍哥只有1粒睪丸，霑叔重幫佢改咗個花名「李一春」，但龍哥就克服晒呢啲身體缺陷成為武術高手，呢點真係好值得尊敬。

成為眾人偶像嘅龍哥亦有偶像，武術上面佢最佩服牙擦拳王阿里。練武好講節奏，所以佢亦好鍾意俄羅斯嘅芭蕾舞家雷里耶夫。而大學讀哲學嘅龍哥，最愛嘅哲學家係德國哲學家尼采同印度哲學家克里希那穆提。前者嘅「超人」哲學觀影響龍哥做人處事都要力臻完美嘅心態，後者嘅哲學觀則係龍哥武術「水的哲學」嘅靈感來源。

大家都知龍哥係詠春大師葉問高徒，但其實龍哥拜師時，葉問年事已高，真正教拳嘅係龍哥師兄黃椁樑同張卓慶。

龍哥除咗係武林高手，亦係舞林高手，佢讀書時期曾經攞過香港Cha Cha比賽全場總冠軍，佢亦曾經以教舞搵外快。

龍哥係《歡樂今宵》節目常客，重同故楓非常friend。

龍哥喺香港拍嘅4套半電影中，都同以洪金寶為首嘅七小褔班底合作無間。元華、元彪更係龍哥御用筋斗替身，因為龍哥唔識翻筋斗。圖中被龍哥鎖住嘅咪成龍大哥囉！

荷里活中，唔少巨星都係龍哥嘅friends，除咗佢嘅徒弟占士高賓同史提夫麥昆外，龍哥同《鋼琴戰曲》大導波蘭斯基兩公婆都好熟，圖中就係波蘭斯基已過世前妻莎朗蒂。重有喎！波蘭斯基曾介紹貓王皮禮士利俾龍哥識，如果龍哥唔死，兩位大哥好大機會合演電影。

大家都知龍哥玩棍勁，佢師傅就係《死亡遊戲》中同佢以雙截棍對拆嘅美裔菲律賓人伊魯山度。山度係菲律賓魔仗同印尼古武術PENCAK SILAT嘅宗師級人馬，身手絕對唔喺龍哥之下。

龍哥嘅徒弟個個猛料，除咗Chuck Norris同Robert Wall呢啲空手道冠軍級人馬，NBA中有「天勾」之稱嘅渣巴亦係龍哥徒弟，佢哋兩個喺《死亡遊戲》嘅對打戲被譽為動作電影嘅經典。最上面張團體照中最高嗰個咪佢囉！成7呎4，一眼睇晒。話時話，龍哥喺美國時好鍾意同黑人、嬉皮士玩埋一齊，你睇下佢着到成個嬉皮士就知。

龍哥嘅完美身形，係佢極刻苦咁鍛煉返嚟，有記載佢出拳嘅拳力有400磅，以佢體形計算，絕對超乎常人。佢亦好鍾意同人拗手瓜，好多打得之人如陳惠敏亦係佢手下敗將。

有傳龍哥過世前用電擊練功，又只飲由生牛肉、蛋白粉、花生醬、生雞蛋、香蕉打碎攪勻嘅飲料。不過有李小龍研究專家話，其實龍哥好鬼鍾意搵好嘢食，好似韓國燒烤、日本菜等，亦好鍾意飲汽水。香港新寧餐廳嘅主廚Dee哥就就話李小龍每次上去都會點生牛肉他他呢味菜。

70年代，香港西洋拳冠軍劉大川曾經公開約戰李小龍，龍哥就以自己「已達不隨便比武嘅境界」而拒絕。但傳聞佢哋私底下曾喺探長鄧生屋企講過手，龍哥以十幾秒擊倒劉大川，重令劉大川重傷要到日本醫治云云。

大家都知龍哥由細演到大，但其實佢嘅親人都係演藝名人﹕爸爸李海泉係著名丑生、哥哥李忠琛前妻係林燕妮、細佬李振輝前妻係森森、姐夫係俞明。黃霑就係佢讀喇沙時嘅同學仔，佢兩個重打過交添，後尾就變咗friend。