【深圳一日遊】必試清甜椰子雞＋麻辣火鍋 深圳5大人氣抵食火鍋推介

撰文：Cynthia@新假期周刊｜ 圖片來源：Day

【深圳一日遊】超抵食！深圳5大人氣火鍋推介

超清甜椰子雞 潤園四季

比起辣雞煲，近年深圳更加流行椰子雞，而網友一致首推潤園四季椰子雞，目前在深圳一共有8間，港人常去的華僑城創意園、卓越Intown、歡樂海岸等都有分店，雖然過關的口岸未見蹤影，但地點來說都算方便。如果想打埋卡，在靚景的包圍下用餐的話，可以去卓越Intown店，3樓是一般室內的餐廳，而4樓的戶外區被佈置得很有熱帶風情，很有情調。

潤園四季椰子雞以清甜的椰青作為湯底，再加入椰青肉，煮滾之後，店員會親自倒入原隻雞，毋須自己動手，服務相當不錯。開始煮之後，只要靜待桌上的沙漏流到另外一邊，就可以開始食用，唔怕煮得太老！

原以為湯底可能會太清淡，想不到反而能突出雞肉的新鮮，就算沒有加入額外的味精及調味料，雞肉本身的鮮嫩、鮮味已好食到停唔到口！

一隻雞都要RMB135/約HK$167不算太平，幸好分量夠多，兩個人食完都已經有7、8成飽。覺得唔夠飽仲可以加竹笙、冬瓜片等食物，與椰青湯底的清甜非常合拍，再加上即開椰青，食完火鍋，一點都不會熱氣！

另一個必點招牌菜是熱辣辣的煲仔飯，一大煲只係RMB55/約HK$68，已經可以share畀2-4人食，入面的配料有臘腸、芋頭等，店員在食之前會先加入蔥花，增加香氣。喜歡吃飯焦的話，可以再焗耐一點，可以挖到又厚又香的飯焦慢慢食！食完之後，每一桌都會附贈一份水果，相當貼心。

潤園四季椰子雞(卓越Intown店)
地點：深圳福華三路與金田路交匯處卓越Intown 3樓

手切牛全宴 大目牛肉火鍋城

香港人食火鍋必點肥牛，但很多都是急凍的肥牛。手切的肥牛不但價錢更貴，選擇也不多。好牛之人去到深圳 ，就可以食到新鮮而划算的牛火鍋。

來自汕頭的潮汕大目火鍋城是擁有37年歷史的老字號，目前在深圳有9間分店，最方便香港人的，自然是皇崗及羅湖口岸的兩間。

大目採用的是溫體牛，每日由屠宰場新鮮送抵，店員在玻璃房後即場切牛，夠衛生新鮮，食得放心。

湯底是用牛骨熬製而成，絕不是一般的味精湯，打邊爐之前記得要先飲碗湯，品嘗一下濃郁的鮮味。

牛肉的劃分細緻，最瘦的嫩肉、半肥瘦的脖頸肉、肥膏最多的黃肥牛，另外還有霜降雪花肥牛、牛舌、黑牛柏葉、尾龍骨等等，絕對是名副其實的全牛宴！

比起一般的冰鮮牛肉，更能保留鮮味，而店員更提醒只淥8秒就可以，口感更加嫩滑，值得一試。

除了牛肉拼盤外，另一個招牌菜手打生牛肉丸亦不可錯過，每日新鮮現打，食落非常彈牙多肉汁，而且加入了牛筋更有口感。

而店內的即食牛腩、牛雜等調味都十分惹味，可以食勻牛的不同部位及料理方法！店內也有麻辣湯底供選擇，不算太辣到會搶走牛的鮮味，重口味者可以叫鴛鴦湯底，一次過試晒兩個招牌湯底！

大目牛肉火鍋城(皇崗店)
地點：深圳皇崗村市場北座1樓

大目牛肉火鍋城(羅湖店)
地點：深圳春風路3068號置地廣場一樓

抵食海鮮鍋 海極鮮蒸汽美食坊

對於在深圳食海鮮，不少香港人都會有顧慮，覺得唔新鮮好危險，食完可能會肚屙！於皇崗有分店的海極鮮美食坊，環境相當寬敞，門口處的海鮮區有齊各種生猛海鮮，可以自己觀察新鮮程度再作挑選，加上明碼實價寫清楚，不怕被劏。

太多海鮮不知如何選擇的話，大眾點評網上不時會有各間餐廳的優惠、套餐等，記者今次就先用app搶購二人套餐，非常方便。

二人餐RMB248/約HK$307有5款海鮮：基圍蝦、白貝、帶子、青口及鯧魚，外加金針菇及娃娃菜，仲有自助水果、小菜吧任食，幾大食都夠飽！

基圍蝦送上枱依然非常生猛會亂跳，證明新鮮程度，而帶子大粒又厚身，加入了蒜蓉同粉絲，更加入味！

食完海鮮後，記得要試埋精華的粥底，所有海鮮的鮮味都留在鍋底，冇加任何調味都可以飲到啖啖鮮味。不過記者點的二人餐海鮮量未算太多，以致粥底味淡，相信多人食會較好。

海極鮮蒸汽美食坊(皇崗分店)
地點：深圳皇崗上圍三村38號一樓

正宗麻辣火鍋 大龍燚

來自成都的大龍燚喺深圳非常出名，記者平日6點左右到達，門口已經排晒長龍，好彩仲有細枱可以坐！一入到去，就聞到超濃烈的辣椒味，平時冇食開辣的話，可能會頂唔順！

店內採微信落單，可以自己用電話揀湯底、食物，落單要鴛鴦鍋微微辣，中間白湯，外圍是布滿辣椒的紅湯，聞到都已經流晒口水！

食材的選擇比海底撈少，主要是少了海鮮，而且冇得揀半份，人少的話唔可以試太多。不過每次都會食的肉類、丸類、菜、菇等都有齊！

牛肉肉味濃，一碟RMB38唔算貴，而牛黃喉、水魷等打邊爐必食，落紅湯吸辣汁夠過癮！雖然只係微微辣，但已經比海底撈辣好多，重口味者必試！

怕辣的話，可以開一罐罐的芝麻油，倒入碗再加蒜、蔥，更加惹味！唔好以為油淋淋好可怕，呢個係四川人的正宗食法，去食的話不妨一試！

食完太多辣嘢，可以試試店內最出名的炸麻糬，炸好的麻糬點一點黃豆粉同醬，入口煙韌好香口，打完邊爐必試！

大龍燚
地址：深圳南山大道2009號一樓D區

最強服務取勝 海底撈

深圳中最多人食、討論熱度又最高的火鍋店，非海底撈莫屬。雖然上年已正式進駐香港，不過很多港人依然會堅持去深圳食，因為無論是價錢，還是服務，深圳都比較優勝，難怪每個場聽得最多的都還是廣東話！

海底撈每次都會大排長龍，好在等位之際有零食、水果任食，仲可以玩飛行棋、試試修甲等，唔怕等到悶！

埋位之後，就可以用桌上的iPad選擇食物，麻辣湯底可以加麻夠過癮，而三鮮湯底更加係強烈推薦，奶白色的湯底本身就非常好喝，加入海鮮、菜、麵等去煮，好味到會忍唔住飲番幾碗。食材的選擇非常多，由肉類、菜類到海鮮幾十種，最正的是可以只叫半份，就算得兩個朋友一齊食，都可以叫好多種食物！推薦必點冇刺巴沙魚片，非常嫩滑且不會腥，另外的牛小排、手切肥牛、滑牛等均水準之上冇雪藏味，值得一選！

海底撈最正的是服務態度，提供圍裙、橡筋，以及膠袋入電話等等，非常貼心。店員更會幫你落蝦滑、剝蝦等，仲會有拉麵表演，好玩又好食。5個人食都超飽，只係RMB597/約HK$741，每人都唔使HK$150，好抵食！

海底撈
地址：深圳羅湖區人民南路2028號金光華廣場L6、L7層

内容延讀：
【全部$100有找】紙番梘你用過未？14款淘寶旅行裝備推介
>>>Like我們FB<<<
https://www.facebook.com/newmonday.com.hk/