洪卓立邀合作 黎特自畫成家
有人會為咗睇漫畫幾日唔瞓，亦有人會為收藏相關figure而灑盡金錢。
今期「Wero」主角黎特自細就係漫畫痴，佢唔單止睇，重會模仿唔同漫畫家嘅畫風畫畫，「黎特風」漫畫就喺模仿中成形，佢重以網絡紅人達哥把聲，加上漫畫製成slide show演繹「高登潮文」。
由於極受歡迎，洪卓立嘅監製都搵黎特繪製MV，佢喺舊年年尾又推出繪本漫畫《潮文連環圖》。半年間由藉藉無名嘅網絡素人，搖身一變成為各方爭相合作嘅網絡紅人，黎特嘅故事再次證明，只要有創意就實有人賞識你！
text – Oscar photo – Yuk
集百家所長
黎特鍾意畫畫，亦好鍾意睇漫畫，7年前佢重走去修讀有關漫畫寫稿嘅課程，學下漫畫基本功，希望可以畫1套屬於自己嘅漫畫。「漫畫最基本係可以畫同一個角色嘅公仔要唔走樣，人哋一睇就認得出邊個打邊個。我嗰時日練夜練，重會搵唔同畫家作品去參考，集百家所長。例如畫『認真樣』會參考《死亡筆記》作者小畑健嘅畫風，佢畫嘅角色都好型仔；至於『衰樣』就梗係參考《去吧！稻中乒團》嘅古谷實同《GTO》嘅藤澤亨。我亦會幫啲圖上色，但我比較懶上色，只會用繪圖軟件入面嘅『油桶』工具，一次過幫人臉以外嘅範圍上色，漸漸變成我漫畫嘅最大特色。」
每個藝術家都希望將作品公諸同好，黎特都唔例外，佢喺13年於facebook開咗個fan page，開頭諗住同朋友「開心share」。「喺facebook可以聽到唔少朋友嘅意見，有朋友話我模仿漫畫家太過似，冇咗自己風格，亦有人讚我畫得好靚。不過對我嚟講，我當時覺得自己畫得麻麻，需要畫多啲去改善畫功。」
《教你八千月薪如何買林寶堅尼》本身都有好多巴打share，畫成連環圖一樣受歡迎，至今有超過71萬人次睇過，係黎特最多人睇嘅短片。
搵偶像「把聲」合作
有留意「Wero」同鍾意香港Youtube嘅朋友，一定唔會對達哥呢位網絡紅人陌生，佢逢星期一至五晚都會喺網上直播打機並加上抵死旁述（www.twitch.tv/underground_dv）。每晚臨「收台」前，都會以佢嘅「老牛聲」讀番篇網絡潮文，將一段段文字變成過癮嘅廣播劇。黎特係達哥「忠粉」，有次佢聽到達哥讀咗篇《小強真係好hihi》，就決定小試牛刀，畫潮文連環圖。
「嗰時聽達哥讀潮文，佢聲演得好好，令我腦海入面出現一幅幅畫面，又醒起朋友介紹過外國有類似slide show嘅短片，即係有人旁白，加上多幅相關插圖，我就諗：不如用達哥讀潮文嘅聲，配以我畫嘅畫製作『潮文連環圖』啦，操練畫功，又可以送俾達哥，當係份fans禮物啦！」達哥就話：「我其實到黎特出繪本時，經出版社介紹先第1次接觸佢。不過早就知道佢用我把聲做其他短片，我覺得冇咩所謂，所以都好歡迎佢繼續製作短片，同網友笑下輕鬆下。」
《小強真係好hihi》好受歡迎，上載1個月已有過萬人睇過，對於1個網絡素人嚟講，係個好鼓舞嘅數字，亦令到黎特充滿自信咁繼續畫落去。不過喺舊年7月，佢毅然暫停再畫，全因覺得「已經太濫」。「畫咗幾條片，好多網友都讚，我當然開心。但後來愈來愈多網友要求畫指定題材，嗰啲題材我覺得一般，初頭為咗滿足網友要求，我惟有照畫。」
黎特首段潮文連環圖短片《小強真係好hihi》，佢話覺得好好笑，但嫌自己畫功較粗糙。
歇斯底里啱卓立
黎特只係個20出頭嘅大學生，但佢比好多「成年人」更識諗。「畫到第9條片《契弟走得摩》時，我覺得係時候要停，一來唔係我想畫嘅題材，二來我想搵下其他方向，我知道咁停畫潮文人氣一定下滑，甚至fans都可能要重新再儲過，但一定要咁做。」
不過有實力始終會有人留意，洪卓立嗰時推出新歌〈副作用〉，因為首歌描述緊古怪社會，佢嘅監製有次睇到黎特嘅潮文連環圖，覺得黎特歇斯底里嘅畫風同首歌好夾，於是就搵黎特幫手製作MV。「當洪卓立嘅監製打嚟叫我幫手製作MV時，我一口就應承咗，因為有機會同星合作，即係有機會將自己嘅作品喺大眾傳媒出現，我諗冇藝術家會抗拒。」黎特話，喺製作嘅過程中，洪卓立方面冇俾佢任何壓力，而佢亦畫得好開心，2星期就起貨，而且第一稿就收貨，令黎特對自己嘅畫功更有信心。
〈副作用〉首歌係諷刺社會光怪陸離嘅現象，好似其中一幕講一班「小狗」（毒男）圍住「電兔」追嘅插畫，以「黎特風」演繹，實在相得益彰。
目標進軍日本
黎特之後有接過電視廣告，亦喺去年年尾推出首本個人漫畫集《潮文連環圖》，除咗結集之前畫嘅潮文連環圖外，裏面有佢嘅首個漫畫作品，銷量重長期喺各大書局嘅10大位置。
只係半年入面，黎特由網絡進入主流，人氣重持續上升，佢同上鏡一樣，好含蓄咁接受大家嘅讚賞。「我出席公開場合，或者接受媒體訪問時，都會戴住面具，因為我好想大家集中關注我嘅作品。我好幸運，因為呢段時間有好多人幫助我，但我知道要繼續努力，因為我希望有日可以好似我偶像陳某（《火鳳燎原》作者）咁，作品受到肯定，可以衝出香港，進軍日本！」
香港有甚麼地方適合與閨密、情侶，一大班朋友去？
與閨密、情侶約會的話，當然要選擇氣氛好的地方啦！全港12間必去天台酒吧 都超有feel，傾得興起難免會飲多幾杯，如果出現這些醉酒特徵 時就要適可而止了！返工返到攰，不如一齊去按摩店鬆一鬆，油尖旺按摩店 非常多，實有一間啱你。一大班朋想熱熱鬧鬧，燒嘢食最好不過了，即刻熟讀BBQ技巧7式 ，包你喺燒烤場上戰無不勝！
家居清潔有甚麼好方法？
家居清潔非常重要，做不好隨時影響健康！很多人因為床褥體積大不容易洗滌，而忽略了床褥清潔，即睇5招床褥清潔方法；冷氣機內外都容易累積大量灰塵，洗冷氣機方法好簡單，輕鬆洗走灰塵黴菌。當然做足家居清潔都不能避免曱甴入屋，10種有效消滅曱甴攻略幫到你！
