跟Katy Perry飲「快、靚、正」士多啤梨香蕉Smoothie

text-Emily（ig：emkiuuuuuuuu） video-pakco

朝早飲Smoothie夠晒健康

Katy Perry最愛 士多啤梨香蕉Smoothie

Katy Perry呢款smoothie有個特別之處，就係佢加咗花生醬。相信你嘅反應一定係：「吓！花生醬好肥喎。」花生醬的確係熱量高，但偏偏就係因為佢熱量夠高，食少少就已經容易飽肚，不知幾多外國明星都係靠佢嚟減肥。

所以以後整smoothie，不妨落少少花生醬，飽肚之餘，重好香口，成杯嘢嘅味道即刻出晒嚟！當然，如果你對花生敏感就千其唔好亂落喇！

材料：士多啤梨約250g、香蕉1隻（事前雪凍）、脫脂原味Greek yogurt 1杯-1杯半、花生醬2茶匙

做法：先將香蕉及士多啤梨切粒，然後加入Greek yogurt同花生醬。將所有材料放入攪拌機到攬勻，即刻飲得！

追加3款勁有益嘅花生醬Smoothie！
1. 藍莓雲呢拿Smoothie

藍莓對眼晴有益之餘，重有好強大嘅抗氧化功效，食得多重可以增強記憶力。自問冇乜記性冇耳性口多多嘅你，記得要飲多啲喇。

材料：藍莓兩杯、脫脂雲尼拿味 Yogurt 2杯、低脂牛奶1杯、花生醬2茶匙

做法：首先將藍莓、牛奶同花生醬放入攪拌機到攪30秒，之後再倒埋啲Yogurt入去，攪勻晒就ok。

內容延讀：

＞唔夠喉？睇多4款明星都飲嘅早餐SMOOTHIES

＞積埋好多毒素？中醫教你點排毒

2.朱古力蛋白質Smoothie

呢款Smoothie係好多健身人士嘅最愛，皆因佢有足夠嘅蛋白質，可以喺短時間內補充足夠嘅體力。想練得一身好肌肉，就更加要飲！

材料：香蕉1隻（事前雪凍）、可可粉3茶匙、Greek Yogurt 1杯半、脫脂奶3/4杯、蜜糖1茶匙、花生醬1茶匙

做法：香蕉切粒，加埋可可粉、Greek Yogurt同脫脂奶攪一攪。之後落埋蜜糖同花生醬，再攪多陣。（溫提：因為材料比較多，最好分幾次攪，先可以完全攪得勻。）

3.蜜桃肉桂Smoothie

蜜桃同花生醬好似大纜都扯唔埋，但只要你試過1次，你就會知道其實佢哋夾到不得了！而肉桂粉除咗香之外，重有清宿便嘅功效，想幫自己排吓毒，不妨試試。

材料：熟透香蕉4隻（事前雪凍）、蜜桃2個、花生醬2茶匙、肉桂粉1茶匙、冰幾粒

做法：將所有生果切粒，連埋花生醬同冰粒攪30秒。之後再落肉桂粉，攪勻晒就飲得。另外提一提，呢款Smoothie冇落yogurt同牛奶，所以加幾粒冰，凍凍哋咁飲會更加好味！

內容延讀：

＞唔夠喉？睇多4款明星都飲嘅早餐SMOOTHIES

＞積埋好多毒素？中醫教你點排毒