專訪世界第一Cue后吳安儀：「要嬴人，先enjoy。」
冠軍絕對得來不易，安儀話自上年大敗俾世界一姐伊雲絲後，一直走唔出失敗陰霾，愈打愈差。好彩心態上調整後，終於成為世界cue后。
「心態調整」4字，筆者寫得輕鬆，但對於成日要同世界頂級桌球手對壘嘅24歲小妹妹嚟講，可以克服心理陰影，先贏自己再贏人，嗰種心理質素嘅提升，比攞獎重開心。
「秘訣，係要先enjoy比賽。」等小cue/cute后同你分享成功之道。
text – Jessie photo – Mike W.、由被訪者提供、網上圖片
https://www.youtube.com/watch?v=6HQlnJAKWUA
吳安儀世界賽威水史
2009 IBSF （International Billiards And Snooker Federation）
世界業餘桌球錦標賽冠軍（約旦）
2010 IBSF世界業餘桌球錦標賽冠軍（敘利亞）
2010 亞運會隊際金牌&個人銅牌
2011 香港榮譽勳章
2013 IBSF世界業餘6個紅球錦標賽冠軍（愛爾蘭）
2015 WLBSA（World Ladies Billiards And Snooker Association）
世界職業桌球錦標賽冠軍（英國Leeds）
運動嘅嘢…
時間返到1年前嘅WLBSA世界女子桌球錦標賽，安儀對正世界一姐伊雲絲，以6:0壓倒性姿態大敗。
「嗰次覺得自己打得好差，差到接受唔到，打完喊到收唔到聲。比賽完咗返香港後就好急住進步，好在意自己喺球檯上每下失誤，就算好小事都會去到唔原諒自己嘅地步，愈打愈辛苦，唔覺唔覺就進入運動員低潮期。中間出過去打世界賽，16強就止步。教練見到我每次打波都皺晒眉，愈打愈憎咁款，就同我講：『運動嘅嘢，一定要enjoy，先會打得好。』佢叫我拋開贏輸層面，唔好當失誤係失誤，應該當係學習機會，總之最緊要享受。」之後安儀慢慢重拾對桌球嘅樂趣，回復狀態。「原來要先放開執着，至可以再擁有更多。」
內容延讀：
＞睇埋另一位追逐夢想之女生，極地馬拉松女跑手
＞遇到低潮都唔怕，睇下療癒傷痛嘅2大運動 BYLIGHTONESS
再對強敵 解除心魔
雖然話回復狀態，但真正考驗，喺安儀今年4月奪冠嘅WLBSA世界女子桌球錦標賽先「嚟料」，佢除咗打女單，重有打女雙同混雙，最重要係再次同「宿敵」伊雲絲硬拼。
「我本以為自己準備好，點知一開始嘅女雙同混雙，都係喺4強輸俾伊雲絲同佢partners。臨打女單4強前，我又開始緊張，就同教練傾偈，我話上年輸咗喊到七彩，之後都有同自己講『下年再努力啦』。我唔想再等多年，好辛苦。」
教練同安儀講，舊年嘅失敗已經過咗去，作為1個選手，要將全副精神放喺即將嚟緊嘅賽事，打好每個波，最重要係，要enjoy比賽過程。「佢呢番說話解除咗我嘅心魔，4強賽我真係放得好開咁打，打到領先3:2時，我打多鋪就可以贏，我迫自己唔好諗咁多嘢，只要享受過程全力打。最後嗰鋪一開始我落後，當有個打黑波嘅機會時，我行去旁邊抹下支cue同埋飲水，令精神集中，之後吸一口氣落場將黑波打入袋！嗰下真係好激動，因為贏到強敵，最重要係贏到昔日嘅自己。」
輸波喊 贏波更要喊
安儀話當時興奮咗一陣就要收拾心情，因為相隔兩個鐘之後要打決賽。「決賽先輸2:0，我同評判講我想去廁所。其實我唔急，只想調整心情。喺廁所嗰幾分鐘真係我嘅黃金時間，成個人平靜落嚟，之後連贏6鋪，重奪得世界冠軍！」
安儀話企喺世界頂峰嘅心情，冇之前想像咁興奮。「細個我成日幻想，攞到世界冠軍應該會開心到大叫：『Yes！』竟然又冇喎。直到搭飛機返香港前，喺機場就開始不停喊，上到飛機都停唔到。輸波我試過喊，不過通常幾分鐘就冇事，贏就真係未試過，重要喊得咁犀利。可能因為神經一路繃得太緊，一放鬆同埋意識到比賽真係完咗，情緒就一下子釋放出嚟。」
父女慶祝齊肚屙
安儀話今次奪冠，當然要多謝教練黃德華，不過更想多謝佢爸爸、香港桌球界嘅頂尖高手吳任水。「自己一向冇心機讀書，爸爸亦從來冇迫過我學任何嘢，只想我開心。」
曾經係IBSF世界大師賽前8名精英球手嘅吳任水，喺安儀13歲嗰陣開始帶佢睇自己打比賽。安儀話細個見到爸爸着住西裝背心、恤衫打呔比賽，覺得好有型，好希望有日都着到咁去打波。「跟住爸爸就開始教我打，我個人細個時渾渾噩噩，自從鍾意咗桌球就有人生目標。爸爸會同埋我一齊去比賽照顧我，所以我都好習慣有佢喺身邊，真係好多謝佢。」正所謂父女齊心，其利斷金，安儀贏嘅比賽愈嚟愈多。「最難忘係07年去印度參加世青U21時，小組出線之後，我哋兩父女食龍蝦慶祝，你都想像到喺印度食海鮮嘅後果啦，就係當晚兩個一齊屙！好彩都冇影響第2日繼續嘅賽事，最終奪得亞軍。」
代父從cue 享受被捕獲
一早已視爸爸係偶像嘅安儀，可以話接咗老父手上嘅（cue）棒，因為佢喺2010年已正式成為全職運動員。「我細個覺得讀書唔叻，大個可以好似爸爸咁做桌球室經理嘅話，已經好滿足。直至出過國打過比賽，先發現原來自己唔止想做經理，我重想攞世界冠軍！」
雖然安儀已經得到女子嘅最高殊榮，但佢覺得嚟緊嘅路重有好長。「我想打多啲男子嘅比賽，因為我平時只會同世界各地女球手比賽，我想同多啲男球手比賽。男仔嘅體力比女仔強，打同一個波，男仔可能用70%嘅力就打到，女仔要用100%力先可打出相同嘅效果！所以平時我都好注重心肺同重量訓練。其實桌球比賽要好長時間，同長跑好似，尾段好靠意志支持自己完成比賽。」
安儀話呢排接受唔同媒體訪問，不停憶述奪世界冠軍嘅情況，心情都重係會有啲激動。「其實我都驚自己係咪有病，屋企人話我就好似個失戀嘅人咁，喺之後不停諗番件事，重複係咁失戀，所以情緒有起伏都好正常。慢慢就習慣咗。而家我都好開心，因為多咗好多人認得我，喺街會被人『野生捕獲』，又會突然有路人恭喜我同叫我加油，我都好享受呢種感覺。」
