買豉油送雞 《Final Fantasy零式HD》
2011年，Square Enix曾經喺PSP平台推出《Final Fantasy（FF）》系列外傳《Final Fantasy 零式》。同一般FF系列好唔同，《FF零式》只抽取咗FF嘅世界觀，例如水晶、召喚獸、魔法、魔導裝甲等，同本傳無關，被喻為係新起點嘅《Final Fantasy》，風格亦較針對日本ACG群體，冇一般勇者救地球咁老正。上星期呢隻高清重製版《FF零式HD》終於登陸PS4，唔再限死喺低規格嘅PSP平台玩，自然令粉絲期待。但即使遊戲有幾高清都好，始終都唔係全新作，相比下，隨《FF零式HD》首批附送嘅《Final Fantasy XV -Episode Duscae-》遊戲下載code似乎先係主菜，皆因呢隻就係《FF15》體驗版。
text-Nam photo-網上圖片
《Final Fantasy零式HD》
平台：PS4
售價：$468（下載版$423）
查詢：2341 2356（SCEH）
學生哥上戰場
《FF零式HD》最大改變自然係高清化，其餘都同原版一樣。故事背景設定喺奇幻世界「歐立安斯」，並以4粒水晶嘅力量分成4個機構，分別以「朱雀」、「白虎」、「蒼龍」、「玄武」為名，隸屬喺4個唔同國家。本來平衡嘅秩序，直到擁有白虎力量嘅米利提斯皇國，對鄰國朱雀領魯布路姆展開侵略而失衡。玩家就係扮演喺朱雀領魔導院第零班就讀嘅12位訓練生，為對抗皇國軍隊入侵而走上前線。除咗高清化外，新增元素重有角色嘅新金色斗篷服飾、遊戲成就、獎盃、隱藏影片等，對冇玩過嘅朋友嚟講，算係無關痛癢，但角色有新衫着，相信粉絲已經收貨。
戰鬥系統最好玩
之前講過，《FF零式HD》風格亦較針對日本ACG群體，12位角色全部都係俊男美女，本身亦係以成為傳說救世主「覺醒者（Agito）」而存在，所以唔好奇怪點解拯救世界咁大件事竟然要靠12個細路去做。流程方面，玩家可以喺12個角色入面揀3個組成小隊，再以小隊接受唔同任務，去逐步解鎖劇情。比較特別嘅係遊戲嘅戰鬥系統，動作性十分豐富，唔係一味死撳掣亂斬，接受到呢類風格嘅話，此作喺業界確實有唔錯評價。
等足10年？《FF15》體驗版
明明《FF15》喺2013年E3已經公布，點解有人話等足10年？皆因《FF15》前身早喺06年已經發表，並預計喺PS3推出，名為《Final Fantasy Versus 13》，後來先借屍還魂成為15。不過，講就咁講，隻game肯定已同當初大有分別。田畑san自己亦深明《FF15》魅力，於是喺零式嘅初回預購版入面，送多隻《Final Fantasy XV -Episode Duscae-》，抽取咗《FF15》遊戲序章劇情再加料炮製，甚至有埋繁體中文字幕，肯定之後玩唔番咁話。得罪講句，對粉絲嚟講，呢隻分分鐘先係主角，想玩呀？買零式囉！
配角變主角有前科
送《FF15》試玩版呢招夠高章呢？不過唔係佢哋第一次咁玩啦，最經典例子要數到96年，當年萬眾期待嘅《FF7》又係死都唔肯出，於是製作人坂口博信就喺另1隻自家監製嘅遊戲《Tobal No.1》入面送《FF7》體驗版。要知道嗰陣FF兩個字，比而家有令人更加瘋狂嘅魅力，於是1隻名不經傳嘅動作遊戲竟然賣出近66萬隻，搞到Square（當時未合併）以為自己真係做到動作game，點知續作《Tobal 2》得番30萬銷量。
