TEKTON 真‧香港製造

筆者讀大學時，有位講師好精彩咁舉咗兩個例子去解釋咩係香港製造：一個係炒公仔面，另一個係喺銅鑼灣嘅香港中央圖書館，前者結合咗日本即食面同埋廣東炒菜方式，後者就係歌德、後現代同宮廷式建築風格嘅大合成，唔好理個成果係點，總之香港人就係有能耐將冇可能擺埋一齊嘅嘢，好協調咁合而為一，創意度簡直冠絕全球。TEKTON就係新嘅香港眼鏡品牌，佢嘅設計絕對秉承咗香港製造嘅精神，眼鏡結合異素材、美國vintage同現代日本鏡形、潮流感鍋釘同高機能hinge設定，大雜燴、共冶一爐。仲有，TEKTON早前推出一條廣告影片，內容主要講父子情懷，小弟唔太明白同TEKTON嘅品牌理念有咩關係，不過由再引證香港精神，就係乜都撈埋一碟！