COS 不平凡低調
廣告
Kanye West幾年前開始喺時裝界備受肯定，《The Yeezus Tour》簡直係演唱會溝時裝show，當時Kanye講過，時裝唔係有錢人嘅專利，特別為呢次巡迴演唱會同美國value牌PacSun造咗一系列平價tee，諷刺嘅係一開賣就俾人掃清光再炒貴轉售。
合理價位係咪冇可能？有嘅，條件係要冇icon效應。COS就係近年冒升得好快嘅合理價時裝，佢哋向來低調，好少搞event或者fashion show，但啲衫非常高質，有cut有機能有品味，但係就比hi-end品牌平一大截。今個春夏季同以往一樣，COS唔會有啲譁眾取寵嘅prints，但係就有簡約嘅靚cuts同details，講多無謂，落鋪睇真身你就會明COS係好嘢。
text – AIR photo – Pakco model – Thiago@STARZ People
你點樣界定COS嘅品牌風格？
自2007年品牌成立起，我哋都秉持摩登、功能性、歷久常新同親民嘅理念，我哋希望一直提供hi-end設計，但又價格合理嘅服飾。
可否簡單介紹一下2015 S/S COS？
今季好多偏向運動風格嘅衫，採用咗特殊物料，例如有mesh、尼龍等，sporty得嚟兼備功能性。
你會建議點襯COS嘅衫？
我哋COS團隊鍾意對比理念同交錯元素，例如西裝配上波鞋同tee、窄身牛仔褲加上皮鞋同埋白恤衫，都係唔錯嘅配搭。
城市時裝空間
啱啱COS喺香港嘅中環4號碼頭搞咗場2015 F/W嘅runway show。COS為隆重其事，重邀請咗本地建築師Andre Fu設計場地，環境相當優美，係風格充滿綠化嘅未來城市感覺，睇嚟COS都非常重視香港嘅市場。
