Air Jordan XX STEALTH 雷射印記

潮流興AJ retro，但講緊最hit嘅復刻，大部分都係MJ退休前嘅實戰鞋款，不過AJ XX嘅紀念性令佢足以成為例外，繼AJ XX 「LASER」之後，「STEALTH」配色亦正式回歸。AJ XX就好似一對用嚟刻畫MJ歷史嘅藝術品咁，由「鐳射之父」Mark Smith以laser pattern刻上1個個MJ生涯嘅經典icons。同2005年版本嘅分別係，復刻版AJ XX 「STEALTH」嘅魔術貼圖案由之前嘅黑色變為啡色，而鞋面亦都以皮革同漆皮重新打造，即使已經有10年歷史，但呢對出自Tinker Hatfield嘅鞋直到而家，望落依然唔覺out，而且避震科技I.P.S.（Independent Podular Suspension）可以精密計算出運動時鞋底嘅20個腳掌着地點，再植入唔同密度嘅Phylon承軸柱，令震動同能量分散，喺AJ系列中係名列前茅嘅落場鞋，當年錯過咗AJ XX嘅朋友，今次重唔追番？