隱世潮店 工廈発見
廣告
香港潮流特色，就係特色小店都唔會做街客，因為佢哋被地產商趕晒去樓上鋪同工廠大廈，全靠媒體同網上宣傳，再靠口碑傳開去，大家先會識得佢哋。今回介紹兩間工廈潮鋪，1間賣本物風牛牌，1間係潮流街牌，各有特色，都係香港少見，且好值得留意嘅好鋪。
text – AIR photo – Pakco、Billy
Red Cloud赤蕓 國產本物牛王
講起牛仔褲，個個都會諗起美國同日本牌子，其實中國大陸都有好嘢。赤蕓（Red Cloud）源自瀋陽，一直造高質素unwashed原色牛，每條褲都係採用可紡性高同纖維細長嘅吐魯番棉。赤蕓堅持採用自己工場造衫造褲，用嘅機器亦係最傳統嘅，例如UNION SPECIAL埋夾機、43200G碌腳機同SINGER鳳眼機，認真hard-core。近期赤蕓喺香港開設海外第1間分店，店主本身有正職，但太鍾意呢個品牌同牛仔褲，引入咗赤蕓，愛本物風嘅都好應該嚟睇睇。
赤蕓香港 觀塘工業中心1期地下F1C 2377 0423
Facebook：Red Cloud HK
MEMORY LANE 有味街鋪
MEMORY LANE係由外國人Maurice創立，佢住過英國，發現香港雖然多潮流鋪，但係太集中，亦都好一式一樣，倫敦、紐約、洛杉磯好多潮鋪都係集studio、office於一身，覺得香港都好需要呢種遠離旺區嘅街鋪，於是最近就開咗MEMORY LANE。MEMORY LANE另一特色係門口有好多假嘅色情廣告，玩street又點可以冇酒色呢？佢哋希望香港人可以get到呢種幽默。主力賣同名品牌同兄弟品牌MADE IN PARADISE，重有書、畫同家品，其中print tee質素非常高，有啲似早期嘅Supreme，支持本地值得去睇睇呢間鋪。
MADE IN PARADISE
兄弟牌MADE IN PARADISE就好唔同，以美國快餐為主題，所以用色好豐富，散發住好開心嘅感覺。
