夏日必備4大帽款推介 戴住過呢個炎炎夏日啦！

撰文：意義衣丨編輯：白仔丨圖片來源：groovybrain,Whoop,Kangol,Asos

夏日必備4大帽款推介

1.Dad Cap
喺80年代Hiphop文化興起嘅時候，當時其中一個最為出名嘅牌子為Polo by Ralph Lauren，而Polo Cap亦成為當時嘅潮流icon。呢兩年嚟最多人戴亦都係Dad Cap，係因為G-Dragon？Kanye West?咁就要問下你哋自己先知啦。

至於點襯其實好簡單，例子有幾百個，但顏色都要留意下會唔會同其他Item撞得太勁，尤其好鮮色嘅帽，一撞色就好明顯。

2.Bucket Hat （漁夫帽）

喺80年代美國rapper LL Cool J經常佩戴漁夫帽出席演唱會以及喺MV裡面出現。最具代表性嘅係佢戴住Kangol嘅Bermuda Casual 系列拍佢個人專輯《Radio》嘅封面。

而最近因爲韓國潮流下，好多人都開始戴漁夫帽，但眼見戴嘅人都係女仔多，究竟男仔點樣戴先好睇呢？睇睇以下嘅例子！

Rihanna喺唔同場合都會戴上漁夫帽，無論咩顏色都輕鬆Carry。

而GullyGuy一向鍾意80年代復古打扮，佢穿上一套運動服，再戴上Bermuda Casual，易襯得嚟又好突出。

3.Flat Cap (賊仔帽)

一提起賊仔帽大家可能會即刻諗起自己阿公落去晨運戴住嗰頂，但其實Flat Cap都係百搭嘅組合，無論係Hiphop Look、英倫Look呢款帽都會為造型畫龍點睛。

近嚟賊仔帽好受日本人歡迎，連藤原浩都十分鍾意戴呢款帽，甚至佢嘅牌子Fragment Design都有同Kangol推出聯名款。

而依家開始都有Rapper會戴賊仔帽，好似中國Higher Brothers嘅馬思唯咁，將Kangol wool 504反戴，一樣咁好睇。

4.冷帽（Beanies）

同親屋企人去旅行，天氣凍嘅時候一定試過被迫戴嗰啲好厚又大嚿嘅冷帽，或者每次戴冷帽嘅時候都會畀朋友笑成個癌症病人咁。經過呢啲經驗，好難可以有自信地戴冷帽出街。

但依家戴冷帽已經唔係為咗保暖，依家好多人夏天都會戴，尤其係短身嘅西瓜帽。《這個殺手不太冷》Leon（回魂夜周星馳）嘅造型，就算唔熟Fashion嘅人都會知道呢個經典造型。

而最近好流行嘅軍裝，亦可以輕鬆配搭冷帽嚟加重味道。

最後，無論你嘅面形點都好，勇於嘗試唔同類型嘅帽，都會令你嘅造型有唔同嘅感覺。仲諗？快啲買番頂過夏天啦！