10 款童年回憶茶點！你又食過邊幾款！

童年回憶茶點 1.花占餅／肚臍餅

「花占餅」又名「肚臍餅」，圓圓的的餅乾上有呈圓錐塔狀的糖霜，像花占形，有白、綠、紅、黃等五顏六色。大家分享不同食法，有人會留下花占，最後才慢慢歎：「花占餅五顏六色真係幾靚，我會食咗餅先粒糖就慢慢嘆」有大量網友都只食花占：「肚臍餅只食上面粒糖」、「我只食肚臍餅粒花」。不少人誤以為這叫做「花塔餅」：「『花塔餅』係杜蟲藥，唔係小食餅乾，咪亂食呀！『花占餅』，『肚臍餅』先係小食」。 花占餅上有五顏六色的糖霜。

童年回憶茶點 2.麥芽酥餅

麥芽酥餅亦是熱門茶點之一，而且頗得大家歡心：「麥芽餅都好食」，有人更邊玩邊食「麥芽餅，偷偷地拎番屋企響張床跳住食」嘩，啲餅乾碎咪跌曬落床到？畀阿媽發現一定會藤條炆豬肉呀！ 麥芽酥餅亦經常吃到。

童年回憶茶點 3. 字母餅

以英文字母作造型的字母餅，可以一邊吃，一邊學英文字母，不知有沒有人用餅乾砌英文生字呢？ 一邊吃，一邊學英文字母。

童年回憶茶點 4. 南乳餅乾

南乳餅是眾多小食中最受大家歡迎的一款，有網民留言科普南乳餅：「原來全名叫做椒鹽南乳餅，一直以來我都叫「咸占餅」，由細食到大，不過好熱氣，最鐘意有不同形狀，心型、菱形、圓形、正方形…， 我特別揀心形來食（幼稚園年代）」大家都大讚好好味：「南乳餅係我死穴」、「細個最鍾意食南乳餅，食到停唔到口」甚至到現在也有吃：「我而家都仲有食南乳餅」現在依然不時見到南乳餅的蹤跡，並未絕跡：「南乳餅依家偶爾都會喺屋邨商場，雞仔餅大王臨時攤檔買到，$50/3樣，仲食到以前嘅味道」。

童年回憶茶點 5. 手指餅

手指餅因像一條條手指而得名，大家都不感到陌生：「鐘意食手指餅」、「依家冇左以前嘉頓果隻手指餅，綠色包裝」不過對比原味，大家好像比較喜歡有朱古力外層包著的朱古力手指餅，另外亦有人愛可以蘸朱古力醬的手指餅杯：「直到現在都有食un un杯手指餅，但係以前好大杯嘅」，我細個都好鍾意食㗎，食朱古力醬多過食手指餅…… 手指餅好香脆。

童年回憶茶點 6. 薏米餅

大家小時候可能吃過這款餅乾，但未必知道這是薏米餅，由小麥粉及薏米粉製成。薏米餅不可以獨自美麗，一家要浸牛奶才更好吃：「我鐘意食你上邊果個薏米餅，浸水、浸奶、浸乜9，都好好食，一定要浸兩秒！」 薏米餅最好浸牛奶同吃，先最有風味。

童年回憶茶點 7. 魚仔餅

網民亦提到魚仔餅：「我鐘意食 “魚仔餅”」魚仔餅亦是我小時候的最愛，每星期都要去小食部買一盒，海洋生物造型的小餅乾脹卜卜，咬下去卜卜脆，細細粒好襟食，有紫菜及雞味及番茄等口味。 魚仔餅細細粒、脆卜卜，好襟食。

童年回憶茶點 8. 動物餅

餅乾以不同動物作造型，深得小朋友的歡迎，每食一塊就會睇下自己食左咩動物，睇下可唔可食夠一個動物園。 每食一塊都會睇下究竟食左咩動物。

童年回憶茶點 9. 水泡餅

水泡餅像水泡一樣脹卜卜、圓碌碌，想不到令人又愛又恨，有人非常討厭水泡餅，簡直成了童年陰影：「我反而諗起最憎嘅水泡餅」、「麈世間，最難食之餅，莫過於此」覺得入口非常乾：「咁鬼乾爭爭都鍾意？」但偏偏就是有人愛這種如沙漠般的口感：「好變態就係鍾意呢種感覺」、「我好鍾意食」更有人用牙慢慢磨：「鐘意，磨牙咁食」亦有人覺得只要伴牛奶或茶水，味道才會upgrade：「用茶或水或奶送服」、「水泡餅要浸牛奶食…牛奶係指熱水加煉奶！」 水泡餅令人又愛又恨。

童年回憶茶點 10. 馬利餅

馬利餅可算是茶點之王，帶一種獨特的奶香，其實是由小麥粉、玉米澱粉、呍呢嗱香精等製成，難怪味道香香甜甜。識食一定是蘸牛奶：「我記得係幼稚園，圓形嘅瑪莉餅浸牛奶，個男同學飲晒杯奶都食唔到塊餅，痴住咗喺杯底，好攪笑因為，我細個只可以飲水」有人更會蘸阿華田：「瑪利餅點阿華田」。