網民熱討香港男仔太矮著唔到長褸 3大因素唔關高矮事？
廣告
對時尚打扮有研究的男士嚟講，可能都會比較鍾意冬天，因為可以著吓褸襯吓衫，多啲選擇，著多幾件都無問題。而香港已進入冬天的季節，啲大褸、羽絨都要拎返出嚟，有男士就留意到長褸嚟講，香港男士好似比較少著，反而係女士多，就於網上討論問係咪因為香港男仔普遍高度問題。
男人著長褸一定要高？
有網民於網上討論區出post問網友們點解香港女仔會著長褸多過男士，因為無論喺其他國家男士喺冬天都會著長褸，相對香港真係比較小，問係咪因為高度加樣子問題，著長褸先會好睇？有唔少網民都認同樓主講法「過膝嘅真係唔敢試，我覺得身型比例要啱先carry到」「個個由你頭殼頂望落去，變返做哈比人著長褸」不過亦有網民分析唔單止係高度問題。
係風氣問題：日本男仔都矮
有網民指出，日本男仔同樣都生得唔高，但都鍾意襯長褸，認為係香港風氣問題，加上因為長褸比較難襯，所以不如寧願唔著就算，起碼唔會俾人笑。唔少網民都非常認同呢個講法，認為唔係高度問題，只係大家無呢個風氣，只要襯得好就好睇「只係香港人慣咗舒服look，著decent少少已經相對突出，比人覺得標奇立異咁，風氣係咁好難改變，覺得著幾高都好 襯得好著長褸都好好睇」
香港太過打扮會俾人笑？
仲有網民話喺香港太過打扮，仲會俾人笑！「香港成個風氣根本唔適合鍾意打扮 fashion嘅人，通倫敦、巴黎、東京呢啲完全無得比，人地啲地方連紳士帽都可以帶，香港一定比人笑」有人仲話就算內地個時尚打扮風氣仲open過香港「其實就算大陸人衣著打扮風氣都open過香港好多」
男人衣櫃太細
有人認為香港地方咁細，住屋環境又細，男仔個衣櫃仲細，長褸相對比較大件，一件都已經霸咗衣櫃好多位，而且冬天時候又短，唔會考慮買長褸。
關鍵詞
長褸
圖片來源：ig＠k_p0k1、ig＠tl_hon、viutv截圖、ig＠mcheung1201、ig＠keung_show、ig＠jeffreyngai、ig＠tysonyoshi
