MIRROR串燒店結業餘波 前員工收追債信被騙300萬 AK、Jer及梁業慘做替死鬼
廣告
人氣男團MIRROR、ERROR成員早前齊齊搞副業搵多啲真銀，不過開業無耐，飲食王國接連重挫，繼早前Jer（柳應廷）、Jeremy（李駿傑）和肥仔（梁業）合資的高級日本料理餐廳「幻Maboroshi」突然宣佈結業後，另外一間MIRROR和ERROR成員Jer、肥仔、AK有份的串燒店「影之鳥」亦宣布結業。結業後除咗有網民爆負評之外，近日又有前員工爆料，MIRROR、ERROR成員慘成替死鬼？！
串燒店結業餘波︳前員工爆料餐廳結業後一直受到追債恐嚇信
據傳媒報導，「影之鳥」宣布結業後餘波不斷，有位前員工爆料指餐廳結業後一直受到追債信恐嚇，仲損失超過百萬元。事源該名前員工借咗400萬俾一位姓葉的餐飲集團高層，聲稱係作營運公司，仲應承會俾佢一間重點餐廳的20%股份。點知呢位姓葉高層的餐飲集團爆發連環結業潮，唔少高層離開，就連入股藝人都宣布投資失敗，借俾姓葉高層的400萬都只係收得返100萬。之後前員工搵返公司商業登記，原來俾佢嗰20%股份的公司，係一間不知名的日本餐廳，而唔係當初答應俾佢嗰間，跟住喺呢1、2個月就開始收到追債信恐嚇信，相信係該日本餐廳欠債有關。
串燒店結業餘波︳前員工分析無故欠債原因：錢被捲走！
據悉前員工表示餐廳一直生意唔錯，仲有人氣MIRROR、ERROR成員加持，不明最後點解淪落到欠債、拖欠租金等問題。前員工翻查餐廳的月結單後，懷疑餐廳的錢都被轉走，而該姓葉高層亦無法再聯繫到。
串燒店結業餘波︳MIRROR、ERROR成員慘做替死鬼
有份投資的ERROR成員肥仔對此事亦有回應傳媒，鬧爆姓葉高層，指佢隨意將佢哋藝人手機號碼俾人，仲叫人哋搵佢哋追數，而拖欠公司係佢完全無聽過，根本唔關佢哋事，表示藝人們慘成替死鬼。仲話呢位姓葉高層似乎係慣犯，可能係呃人，不過自己都承認因為忙於演藝工作，所以忽略打理餐廳，先最終俾人呃。
網民：成件事擺明老千局
唔少網民睇完都感不憤，表示MIRROR、ERROR成員真係遇人不淑，分析成件事擺明老千局「成件事擺明老千局，借藝人牌頭呃人入股，有錢就轉走，間餐廳幾好生意都無用」「其實個原理同堆KOL收錢賣人氣幫JPEX搭棚搵食一樣」「唔睇實盤生意開咩公司都死」「集團2個高層拎住幾千萬移民嘆世界了」「算唔算虧空公款」「報東張」「借鏡名氣賺錢」
圖片來源：OpenRice「影之鳥」截圖、IG@ jeremylaous、MV截圖、IG@kagenotori_hk
