MIRROR陳卓賢Ian剖白心路歷程：由心理困擾到與家人關係改善

心理困擾與自我封閉

Ian分享，早期的他因經常被誤解而選擇不與人溝通：「有段時間嘅我較封閉自己，因為成日畀人誤會，可能我想表達A意思，但大家會接收咗B意思，又或者見到我唔笑，就覺得我好cool，同人溝通有好多誤會產生，咁不如唔好溝通，久而久之變得封閉，反而近年嘅我願意同人分享多咗，可能因為個人成長咗啦。」他坦言，從2020年至2022年中，他的心理健康狀況一般，當時他並未意識到問題的嚴重性，「嗰時成日唔開心，匿埋自己喊，可能係公司合約上嘅事，或者媒體報道嘅嘢，例如明明我冇做到，點解講到我有做，我會好唔開心。」

張敬軒啟發與信仰力量

在張敬軒的影響下，Ian學會了處理情緒，「我同佢(張敬軒)熟咗之後，發覺有好多相處點，佢亦會話我早段日子，同佢以前後生好相似，佢想我好啲，所以分享佢嘅經驗，開導咗我好多，同佢之間有種信任，知佢講嘅嘢係為我好，於是我試下做個改變，發覺自己舒服咗，冇再咁牛角尖。」此外，Ian透露自己自小接受天主教教育，即使成名後，仍保持祈禱的習慣，「開騷前會祈禱，祈禱可以令自己心神定啲，有清醒頭腦去處理問題，當工作遇到控制唔到嘅事情，我會祈禱。」

與家人關係變化

Ian也談到了與家人的關係，「出嚟做嘢之後，反而同家人關係Close咗，因為我喺屋企係最細，屋企有4兄弟姊妹，阿哥、家姐大我好多，細個嘅我好似獨子咁長大，佢哋唔會同我玩，亦唔溝通到，因為我可能啱啱升小學，佢哋已經中學，到出嚟做嘢後，大家話題及面對事情相似咗，關係比以前Close咗。」他回憶起小時候因為頑皮而經常被父母體罰，「以前大家都係體罰，而家小朋友坐唔定，大家會知道可能有其他問題，例如ADHD(專注力不足)，而家有呢啲認知，但以前一概係曳，以前嘅我都係坐唔定，父母覺得唔乖就打。」