【叱咤樂壇2020】MIRROR三子爭新人獎 Anson Kong夢想幻滅全程失落！

【叱咤樂壇2020】《叱咤樂壇流行榜頒獎典禮2020》昨晚就在九展Star Hall內圓滿結束，今年新力軍共有10個單位齊爭奪，當中有三個就同是來自ViuTV力捧的男子組合MIRROR的成員，當中Anson Lo（盧瀚霆）和阿Jer（柳應廷）就以個人身份分別獲得「叱咤樂壇生力軍」的銅獎及金獎，但好兄弟Anson Kong（江𤒹生，AK）卻失落獎項，阿Jer（柳應廷）在台上領獎時欲鼓勵兄弟，惜無心令全場焦點都放在失落無表情的Anson Kong身上，從而惹起兄弟為爭獎不和傳聞。

撰文：東方新地｜圖片：叱咤903截圖｜編輯：HM（原文刊於：東方新地）

MIRROR兩度上台攞獎，Anson Kong個樣都怪怪地唔多寬容，為拎新人獎看來壓力好大。

【叱咤樂壇2020】MIRROR三兄弟同爭新人獎

今年的《2020年度叱咤樂壇流行榜頒獎禮》少了樂壇天王天后級撐場，又冇現場觀眾，不過氣氛不減，在頒發「叱咤樂壇生力軍大獎」時更有火藥味，MIRROR中三位成員Anson Lo（盧瀚霆）、阿Jer（柳應廷）和Anson Kong（江𤒹生，AK）都是入圍角逐的歌手，率先獲銅獎的Anson Lo一聽到得獎名單，驚喜得碌大對眼彈起身準備上台，一班兄弟亦好自然湧上前抱抱。

MIRROR的阿Jer成為吒咤樂壇新力軍的金獎得主，與他同坐的Anson Kong表現得極冷靜，坐定定拍手。

隊友台上踢爆AK唔開心

好戲在後頭，當再宣布MIRROR另一隊友阿Jer勇奪金獎，MIRROR各成員都非常興奮，離開自己個位好激動衝上前包圍阿Jer，鏡頭影住眾人擁作一團好開心，只有坐在阿Jer旁邊的Anson Kong異常冷靜，坐到個人直一直默默拍手，戴住個口罩都感受到他黑面，當其他MIRROR成員起鬨完，阿Jer感到唔對路，好有風度主動攬攬Anson Kong，在台上致謝詞時更指住台下Anson Kong說：「Anson Kong唔好唔開心，我哋一齊繼續努力，加油！」鏡頭一轉到台下，被踢爆不爽的Anson Kong局住點頭回應，不過塊面依然好黑。

估唔到阿Jer會叫台下仲嬲嬲豬Anson Kong唔好唔開心。 — 估唔到阿Jer會叫台下嬲嬲豬的Anson Kong唔好唔開心。

夢想破滅忍唔住黑面

同是《全民造星》出身的MIRROR十二子，繼姜濤和Ian陳卓賢之後，就只有Anson Kong、Anson Lo和阿Jer被安排在今年推出solo新歌，三人的歌曲風格各異，有R&B、跳唱和抒情慢歌，當中AK更有三條不同主題的短片配合，可見經理人花姐落足心機栽培。據知Anson Kong為人有性格，一直覺得自己靚仔又識跳舞，對自己信心十足，而他早前接受訪問亦坦言，自小的夢想就是可以拎到叱咤的新人金獎，點知今次與兩位兄弟一齊角逐，自己卻三甲不入，一時唔開心忍唔住黑面，真性情盡現。