ERROR演唱會海報疑抄襲 網民轟：直接抄人哋concept
ERROR演唱會海報疑抄襲 網民轟：直接抄人哋concept
由ViuTV節目《全民造星》誕生的組合ERROR，一向都以搞笑藝人方向出法，不過其成員都有推出唔少歌曲，例如《愛情值日生》、《我們不Chok》等等。而成員都會推出自己的單品，例如吳保錡的《猥瑣》、193郭嘉駿的《再次Puppylove》等等，團體在坊間都有著不錯的聲譽及成就。
ERROR 12月搞演唱會
近日ERROR就宣布將於12月16-18日期間舉行《明星生活ERROR Live Show 2022》，在官方Instagram上寫道：「出歌、拍劇、自肥，試過。死亡行星、地陷、成身曱甴，都試過。經歷過高低起跌，ERROR終於再次開show，話你知ERROR式明星生活！」。
演唱會概念抄足本地Rapper團體！？
不過其Poster的設計以及整個演唱會理念「明星生活」，被發現與本地Rapper團體「The Low Mays」在以往推出過的專輯《人生贏家2：明星生活》概念類似。「The Low Mays」早在一年前推出過歌曲《明星生活》，並同年推出相關專輯。
The Low Mays直線抽擊ERROR
而近日密密浦頭的「The Low Mays」，都直插ERROR的演唱會概念是抄襲自己，直接一連數個Story直接Tag晒ERROR IG以及MakerVille去要求解釋，直插：「點解冇人同我講ERROR想幫我哋搞返場演唱會」、「大佬你抄我哋功課，都唔好抄成咁啦。」。團體之後再出post用上自己的歌曲《明星生活》再配上自己的專輯封面同ERROR是次演唱會的宣傳海報，在Caption更加上：「真係無橋到要抄咩？」去質問ERROR。而唔少「The Low Mays」的Fans都幫其講說話，先是在他們的IG上紛紛力撐「建議你地同一日開show，想睇」、「笑死我，出歌就抄日本King&prince，開鋪頭抄韓國牌子，出show直接抄本地。」，就連歐鎧淳都留個慘慘Emoji去戥「The Low Mays」唔抵！
ERROR宣傳Post捱洗版式狂鬧
而ERROR的演唱會宣傳post上面都佈滿唔少網民的謾罵聲「我仲以為同thelowmays 合作，點知原來copycat ，真係DLLM」、 「用左呢個名唔請老味（The Low Mays）做嘉賓講唔過去」、「所以真係credit都唔比返老味（The Low Mays）？直接搬字過紙？viu tv到底係帶動文化定係令香港變文化沙漠」、MakerVille又搞show、今次仲要直接抄人哋concept。希望大家記得呢間公司點對待藝人，買飛只係助長緊佢哋嘅無良」。仲有人大爆當年花姐睇唔起「The Low Mays」的成員之一蜜峰翁！
