C君演唱會大爆出年娶港台之花 原來曾遭前女友悔婚！
撰文：東方新地｜圖片：C君、陸永、黃天頤Instagram、西瓜facebook｜編輯：乖乖l（原文刊於東方新地）
C君宣布明年娶港台之花黃天頤
近日，農夫於旺角麥花臣場館開演唱會，除座無虛席外，C君更於棟篤笑環節中，向在場觀眾報喜訊，透露自己計劃於2019年與港台DJ女友黃天頤結婚！C君更已為婚禮諗定兄弟團人選，指打算邀黃翠如為兄弟團成員之一。
現時34歲嘅C君，因患有重型地中海貧血症，需要終生定期到醫院輸血和接受藥物治療，因此自小C君就有著與平常人不一樣嘅生活。
C君原名鄭詩君，於2000年與陸永組成hip hop組合農夫，出道後雖無緣走偶像派路線，但憑住二人機智嘅反應同口齒伶俐，成功打響組合名號！雖然組合暫時尚未能踏入紅館舞台開騷，但今年亦於旺角麥花臣場館開演唱會。
據知，C君於單親家庭中成長，幾歲時，母親離棄家庭，父親則因需長期於內地工作而無暇照料C君，故C君自細就由祖母湊大，與祖母感情非常要好！
陸永曾向傳媒透露，指好兄弟C君過往經歷過「爛桃花」，難過嘅經歷更潛移默化影響C君嘅感情路。10年時，C君曾宣布與拍拖6年嘅圈外女友Gloria於12年結婚，當時仲用咗十幾萬買戒指！
可惜，喺11年時，有指其女友Gloria因擔心C君嘅地中海貧血症會遺傳畀下一代，故思前想後後最終決定與男方分手！
同年11月，C君承認已經與未婚妻分開，仲透露分手初期有喊。除了Gloria外，C君其後亦曾短暫與林珊珊女兒西瓜拍拖，但都係分手告終。
然而，經歷過「爛桃花」嘅C君依然樂觀看待，重新找到另一半時，C君就講過：「是新的好開始，我有我advantage——她知道我一定有誠意結婚。」4年前，C君開始與今年34歲有港台之花嘅DJ黃天頤拍拖。
天頤更不時會上載與男友C君出席友人活動時嘅大合照，例如同男友慶生時嘅生日派對、聖誕派對等，都會見到二人蹤影，可見女方非常融入男友朋友圈中！
據了解，C君對女友天頤寵愛有加，加上近年收入大增，故曾講過「希望給女友住好一些」，坦言目標是購入貝沙灣豪宅與女友居住。儘管現時目標尚未實現，但C君亦租咗荃灣千呎單位與女友同居，盡顯對天頤嘅愛！
今年10月，曾有傳媒發現C君與女友天頤行婚紗展，而C君亦坦言為婚禮做功課睇資料！另外，由於C君經歷過悔婚嘅關係，故曾深思熟慮婚後生兒育女問題，不過C君指自己會尊重女友決定為先！
