Angelababy香港人氣不減 粉絲接收工私服勁吸睛！

現年36歲嘅Angelababy（楊穎）2023年因為俾人影到喺法國巴黎睇瘋馬騷（Crazy Horse Paris），令大批網民不滿，之後仲喺多個社交網站遭到禁言，疑似被「封殺」。雖然喺2024年初解禁，但人氣已經大不如前，不過仍然有一班忠實粉絲繼續支持。近日，佢喺香港出席活動，獲粉絲熱情接工。佢嘅私下裝束意外成為焦點，引起唔少討論！

自從喺內地市場曝光率減少後，Angelababy被發現頻頻現身香港，外界猜測佢有意喺香港重新發展事業。最近，佢喺香港出席活動時，仍然吸引咗一大批粉絲跟隨支持，甚至有粉絲專程從內地來港，一齊接Angelababy收工。見到粉絲們咁熱情，佢亦相當識做，主動走上前同大家互動，幫粉絲簽名兼合照，仲同大家傾偈，完全冇大明星架子，非常親民。

Angelababy喺香港嘅人氣依然高企，而佢同粉絲互動嘅片段曝光後，私服造型意外成為焦點。當日佢身穿一件貼身粉紅色短袖上衣，搭配牛仔褲，完美展現好身材。從側面睇嘅S形身材更加明顯，腰部幾乎零贅肉，小蠻腰非常吸睛。雖然已經係人母，但佢整個狀態依然充滿少女味，完全唔輸時下嘅年輕女明星，令人驚嘆！