《全民造星3》Alina打入十強黑歷史被翻曾介入胡定欣戀情做第三者

《全民造星3 》今周來到「20強入10強」淘汰賽，大熱黑馬MIRROR成員邱士縉（Stanley)的舞蹈員女朋友Alina(李靜蓮 )，憑著舞蹈技巧而成擊倒人氣王Manson，成巧晉身十強，參加本月26日的「十強爭霸」；其實入行四年的 Alina 曾有過不少的演出經驗，多為二、三線的角色，但要數到最出位，就必定是初入行時就介入胡定欣與音樂人陳明道（Terry)之間做第三者。

撰文、圖片：東方新地｜編輯：八卦妹（原文刊於：東方新地）

Alina打入《美選D.n.A 》八強 4年前曾姣搶胡定欣男友

《全民造星3 》正進行得如火如荼，參賽者中聲色藝俱全之人不多，Alina（李靜蓮）有樣有身材而且舞技出色，四年前曾參加ViuTV選美節目《美選D.n.A 》打入八強，今次參加《造星3 》未出場已被其他參賽者視為實力保證，此外，她更是男團MIRROR成員邱士縉（Stanley)的女朋友，二人拍拖約兩年，不時高調放閃。對娛樂圈野心勃勃的Alina，出道初期曾姣黐著名音樂人陳明道，而當年陳明道正與胡定欣拍拖，有指因為Alina的出現令二人分手收場。

29歲的Alina(李靜蓮 )13年在演藝學院舞蹈系畢業，曾為譚詠麟、林峯、劉德華等伴舞，樣子甜美有身材有舞蹈底子，參加《全民造星3》即成為大熱。

四年前的Alina 25歲，初出道心急上位的她，遇上著名音樂人陳明道，明知男方當時有女友胡定欣都黐埋去，機心甚重。

陳明道睇住 Alina入行，公然稱對方做 Baby Lin，更推薦Alina為林峯演唱會伴舞，更成為林峯 MV女主角，又帶女方到處應酬見朋友，錫 Alina錫到出面。

當年胡定欣已跟陳明道拍拖一年幾，以結婚為目標的她收起港女性格，兼行未來奶奶政策，可惜分手收場。

Alina與陳明道過從甚密，不時私下約會，當年胡定欣去大馬登台，二人曾被本刊記者影到撐枱腳，女方對住陳明道如開籠雀，邊咬包邊講唔停，陳明道就冧爆望住對方。

行足4年霉運為上位做小三

據知當年Alina向陳明道埋手全為了上位，知情者透露：「Alina喺Dancers圈出晒名姣，逢仔冧逢仔電，Terry(陳明道)專幫啲巨星演唱會做音樂總監，佢對Alina特別照顧，成日介紹畀啲歌手朋友、MV導演識，有次阿倫喺外地開騷，完騷帶隊宵夜，Terry帶住Alina去，平時應酬都帶埋Alina，不過佢哋年紀相差太遠，Terry做得Alina阿爸，一齊耐咗Alina開始悶所以最後散咗！Alina覺得自己有條件紅，唔甘於只係做閒角，所以參加《造星3 》希望有多啲機會。」

Alina16年參加選美入行，可惜八強止步，之後她拍過無綫劇《宮心計2深宮計》飾演宮女芙蓉

又曾參演 ViuTV劇集《黑市—上樓 + 詭聲》，因為工作機會不多亦沒有發揮，Alina有感自己懷才不遇，行足4年霉運。

Alina天生惹火，對住所有雄性動物都姣到盡，當年參加《美選D.n.A》，對住譚校長放晒電，

Alina早前接受訪問時坦言非常羨慕男友Stanley可以一舉成名，說到自己比男友早入行但總是行衰運，她更一度落淚，所以她今次參加《造星3 》博到最盡，連續幾個回合都見她打扮性感，多次露出大長腿大做一字馬等高難度動作，由於比賽至今都是以小組形式進行，有身材有舞技的Alina每次出場都令人眼前一亮，勝算甚高，不過她深知唱歌是其弱點，已穩入十強的Alina，姣功用盡是時候表現實力。