黎明演唱會｜黎明大騷舞藝兼分享Keep Fit之道 與鄭秀文合唱《信者得愛》：城城見到應該會鼻水直流怯一怯！

撰文：八卦妹｜圖片來源：寰亞娛樂、鄭秀文IG

黎明演唱會胡楓、袁劍偉孖林嘉欣齊齊睇

黎明（Leon）昨晚（11/7）在紅館舉行第二場演唱會，契爺胡楓（修哥）、霍啟剛與太太郭晶晶、導演袁劍偉與太太林嘉欣、蔡一傑及童愛玲等捧場。

【黎明演唱會】黎明分享自創Keep Fit「風呂減肥法」

眾所周知Sammi勤力做運動，經常分享滿頭大汗片段到社交平台，她一出場，Leon就跟她分享「出汗」心得，他說：「Sammi，你做運動Keep Fit好勤力，我見你流好多汗。咁你知唔知我點Keep Fit？（你有Keep過 Fit咩？）有。（係喎，Fit咗喎！）我係用日本風呂式。（即係點？）首先開個Bath。（除唔除衫？）除衫，然後浸落去。（嘩，好有畫面喎！）諗住自己喺日本，聽風呂音樂浸20分鐘，起身著返件浴袍，房入面開28度空調，食碗辣麵，坐15分鐘，成身流晒汗，肯定冇咗3至4磅。（包你流埋鼻血添呀！）唔會啩？（每個程序都咁熱辣辣。）」Sammi笑說：「又浴缸又除衫，好有畫面⋯⋯見到你啲肥肉呀！依家冇，依家好Fit！」Leon說：「肥肉會慢慢變少，水份嚟啫！」

Leon再向Sammi請教節食減肥，他說：「有啲人減肥，每日只食一粒豆，你有冇試過？」Sammi說：「一粒豆？減肥？呢個唔係減肥法，係減壽法喎！一日一粒豆真係唔掂，起碼食兩粒，早晚各一粒，飽啲！」全場爆笑。續說：「好多人都以為我不斷減肥，其實我依家做嘅功課唔係減肥係Keep Fit，做運動和食得健康，最緊要健康，肥嘅瘦嘅都唔緊要。今日嚟到呢個舞台見到你，依然咁靚仔！」

【黎明演唱會】鄭秀文爆黎明曾自薦監製歌曲 惜最後遭「放飛機」

講到興起，Sammi爆料：「我要爆黎明少少嘢，佢唔知由幾時開始個人好飄，好迷離。幾年前佢打電話俾我，話想幫我監製一首歌。我心諗：乜你識監製歌嘅咩？心裹滿是疑問，不過見你係黎明就好啦！然後你搵咗你老友又係我老友Mark（雷頌德）幫我寫咗首歌《犀利》，我記得你仲話要幫我拍MV。MV？於是我上網查吓你拍過咩MV。點知有一日，你又話我知唔得閒，唔幫我拍MV啦！嘩，乜你咁飄架？你啲節奏好難跟呀！」

Leon坦言：「我知我成日講嘢斷片，生活都係咁。（啲人話生咗仔會無記性。）又唔係我去生。（生女可能會好啲。）可能係，哈哈哈！」合唱前，Sammi扁咀話本來想唱新歌，但Leon卻指定唱另一首，Leon立即轉話題：「Sammi新MV好正，我好期待，聽講拍咗20個鐘。」Sammi說： 「係，好貴！唔係話貴一定好，但好有誠意！（貴一定有誠意）有時唔貴就用誠意搭夠⋯⋯哎吔，我唔夠你講，我要唱歌啦！」

【黎明演唱會】與鄭秀文合唱《信者得愛》黎明又Rap又跳掀高潮

二人合唱《信者得愛》，Leon不但戴上太陽眼鏡伴舞，更Rap歌，Sammi和觀眾都非常驚喜，全場歡呼尖叫！

【黎明演唱會】鄭秀文騷後自言成功打開Leon的腿和腳：城城見到應該會鼻水直流怯一怯

鄭秀文在上台前就在其社交網上載她在紅館後台行Catwalk短片，留言：「今夜再踏入紅館。搵返自己曾留下的腳毛。腦裡馬上浮現兩年前在這裏興奮舉行Follow mi #想起跟全場觀眾一想瘋狂舞動瘋狂high真的超開心 #有幾多俾幾多的感覺返來了#下一個演唱會又有下一個演唱會的新意念」

其後Sammi又再在其社交網上載兩條在台上與黎明合唱《信者得愛》的片段，並笑稱：「Mi的『信者得愛』成功打開了Leon的……..腿和腳，黎生跳舞！而且是很狂野嗰款城城見到應該會鼻水直流怯一怯。 （I’m just kidding!!! 城城是the best 舞王)Mi在台上忍唔住狂笑Leon 跳。舞。Mi 。 唱。歌。哈哈！今晚好好玩。謝謝黎生的邀請。#Mi今晚成功打開了黎生的腿 #信者得愛的魔力#mi的演唱會癮出來了 #看來我要快快想想開concert的事#dancelikenobodyswatching #瘋狂mi遇上斯文黎」