37歲黃子恆洗心革面、禁女埋身 靠《機場特警》翻身有望？｜頭號粉絲
加上電視台鬧小生荒，形象再次插水的黃子恆最終有得留低。呢年半以來黃子恆乖乖仔上身，完全禁女埋身，更被拍到搖身一變成為陽光孝順運動男，戲中與已為人母的孫慧雪有連場咀戲， 成功製造不少話題，話哂黃子恆出道20年，希望TVB睇到佢嘅誠意啦！
撰文、圖片來源：東方新地｜編輯：iluvhk （原文刊於《東方新地》）
37歲黃子恆入行20年 靠《機場特警》翻身有望
黃子恆禁女埋身勤洗底
16年搭上人妻裕美，間接導致裕美與林恩浩三年婚姻離婚收場，18年再陷桃色糾紛，被懷孕四個月廣州粉絲踢爆係經手人，黃子恆形象再三受到重擊，上位之路一度受阻。幸好命不該絕拍劇機會仍在，黃子恆年半來亦小心翼翼積極洗底，戒蒲戒玩戒埋女色，放假清一色全男班行山踩車划艇，唯一近身女性都係同住的媽媽，生活健康陽光仲好孝順，疑似洗心革面重新做人。
禁色禁慾家庭日
日前放晴，即見日日運動身體好的黃子恆又出動。未到中午，一行四人已經落山去到西貢菠蘿輋，擺明早睡早起大清早已經上山。人生路不熟行到半山腰見到小巴站，猶豫一輪由黃子恆拍辦，決定都係搭少程車原途行番落西貢市攞車走人，修心養性近兩年，體力同腳骨力都的確大躍進。平時行山踩車搵男性友人做伴，呢日周末就輪到家庭日，同行的有做玄學家的媽媽、亦有任網球教練的哥哥。
其實年半前因為偷嗒粉絲爆煲，黃子恆自爆壓力大到一度被確診有驚恐症，至今依然要定時服藥，亦不敢再打開心扉拖都唔敢拍。不過經一事長一智，新劇角色正義戲份吃重，眼見再獲觀眾接受，又因頻頻家庭樂和媽媽、哥哥行得更近，都係一種收穫。
情慾黑歷史
現年37歲、入行接近二十年，黃子恆捱足十六年才備受重用，點知2016年被傳媒拍到與人妻裕美同居，二人即時拍片當眾道歉，又澄清女方早因家暴與丈夫分居。
經此一役都未學精，年半前正值《機場特警》拍攝期間，黃子恆又被廣州粉絲踢爆見面第二日已經上床，女方懷孕後男方更一直玩失蹤。事後黃子恆否認係經手人，但就承認曾經有性關係。
