馮盈盈掛住瘟仔人氣跌 高層照肺要求低調戀情力挽人氣
廣告
馮盈盈原本事業愛情兩得意，出道不久已在台慶頒獎禮奪「飛躍進步女藝員」獎，事業走勢凌厲，更有個十優醫生男友羨煞旁人，不過自去年宣布同醫生男友Martin分手，被踢爆暗撻大隻奀星主播鄭衍峰，馮盈盈連女神光芒扯走埋，日日戀愛大過天，負評不斷埋身，被指黐富二代同江嘉敏反目，近期更被網民狠批演技大倒退，形象人氣雙線下滑，日前無綫高層急召馮盈盈照肺，要她低調戀情力挽人氣！
撰文、圖片：東方新地 ｜編輯：K.P（原文刊於：東方新地）
馮盈盈陪大隻仔夜跑死口唔認拍拖
現年26歲的16年港姐冠軍馮盈盈，出道即被無綫力捧，原本事業一片光明，不過今年四月馮盈盈被爆早於去年撻著大隻主播鄭衍峰（Leonard），更有指她瞞著醫生男友在加拿大劈腿而導致分手，負面新聞一大籮，不過馮盈盈未有避忌，為愛更完全豁出去，同大隻仔愈愛愈高調，攞正牌在《後生仔傾吓偈》節目高調放閃，可惜戀情唔討好，人氣不升反跌。據知情者透露：「雖然以前Fyy 都成日將寶寶（前醫生男友Martin）掛喺嘴邊，但觀眾覺得佢夠率性，反而好鍾意佢，唔似依家死口唔認拍拖但又成日同大隻仔喺節目耍花槍，冇晒自己Character ，本身大隻仔外形唔討好，知名度又低，觀眾緣欠奉，搞到Fyy連人氣都拖低晒！」
開工掛住玩電話網民狠批演技大倒退
早前熱播的《反黑路人甲》，馮盈盈被網民狠批演技大倒退，近日趕拍《智能愛（AI）人》的她，經常掛住玩電話。同無綫尚有多年合約的她，日前便被高層急召照肺。據知情者透露：「無綫咁辛苦捧Fyy上位，當然唔想睇住佢衰，講到尾，都係希望佢專心工作，希望佢識得權衡輕重，重新出發啦！」不過馮盈盈能否開竅，真係睇佢造化嘞！
