馮盈盈自爆跟緋聞男友鄭衍峰操蜜桃臀 慘被鄭衍峰當面批評：PAT PAT唔夠翹！｜頭號粉絲

文：東方新地｜圖：東方新地、馮盈盈IG、鄭衍峰IG｜編輯：八卦妹（原文刊於：東方新地）

馮盈盈鄭衍峰拍住拖開工

26歲馮盈盈和29歲緋聞男友鄭衍峰多次被斷正返女方香閨，座駕又任男友揸，馮盈盈更已融入男方朋友堆中，雖然死口唔認拍拖，不過公然寓工作於拍拖亦毫不避忌，近月孖住主持《後生仔傾吓偈》，主動爆料唔介意成為話題。在《星光熠熠耀保良》中更被安排表演跳舞，雖然表演時毫不親密又hea爆，不過大方合體接受訪問，不避嫌互窒打情罵俏﹗

馮盈盈被緋聞男友當面話「堅懶」

馮盈盈自爆近來正跟身兼健身教練的鄭衍峰操蜜桃臀，訪問時被問到操練成果如何，鄭衍峰當面話馮盈盈「堅懶」，被問到覺得馮盈盈臀部是否唔夠翹？鄭衍峰口快快話「唔夠翹」，又話：「一定唔夠翹㗎，所有人都唔夠，永遠都有進步空間㗎﹗」眼見馮盈盈冇晒表情仲未知衰繼續踩多腳：「你問我自己臀部係咪標準？咁就一定唔標準，因為男仔操埋腳太大著唔到窄身牛仔褲，所以我唔係標準，但女士個臀部呢，係非常之需要嘅。」被不留情面狠批的馮盈盈點頭：「知道﹗我會繼續努力囉﹗認唔認同佢講？梗係認同啦，永遠都有進步空間。」

馮盈盈焗住大方：「我冇唔開心﹗」

馮盈盈被鄭衍峰爆懶做運動，又狠批pat pat唔夠翹，一直撳住度火，保持笑容，及後笑住反擊：「我唔會唔開心，佢嘅要求同標準係專業model級，所以so far佢識嘅人裡面應該冇去到呢個level囉﹗所以我冇唔開心，因為我知佢嘅level係好離地嘅﹗我惟有繼續努力啦﹗」

馮盈盈獲鄭衍峰氹番：「樣有99分﹗」

當記者問鄭衍峰對馮盈盈的身材評分時，馮盈盈大叫：「嘩﹗好殘酷呀﹗」鄭衍峰終於知衰：「99分啦，100分滿分，香港小姐冠軍喎，99分係個樣度﹗操唔到個樣㗎嘛﹗（其他方面零分？）另外嗰啲零分囉﹗」被讚樣有99分之高，馮盈盈明顯相當受落，反畀鄭衍峰呢個教練100分﹗馮盈盈：「係我揀嘅，如果我都唔肯定佢，我咪即係質疑緊自己？」呢句話似乎語帶雙關喎﹗