柳應廷新歌《約齊靈魂在墳墓開生日派對》上線 延續荷李活怪誕風格

夢幻聯動Jay Fung！

在創作新歌的過程中，柳應廷與音樂人Jay Fung合作，由Jay Fung負責作曲，周耀輝填詞。柳應廷對這次的合作感到非常期待，他說：「自己搵咗佢好耐，一直都好期待同佢合作會係點，因為佢寫嘅旋律都係好挑戰性。我特登搵佢寫，佢一口就應承咗，一寫出嚟個Melody都冇乜點樣改過，已經代入到故事，幻想係一班瞓著咗嘅人發緊惡夢，第一次聽demo已經有呢個畫面，所以沿住惡夢夢境，Gather(聚集)暗黑靈魂做一啲嘢。」Jer然後就將自己的感受，分享給周耀輝，Jer 道：「我有講過例如大家覺得惡夢係一件唔好嘅事，發緊惡夢你會好驚，但其實某程度上潛意式醒返之後你會克服咗啲嘢，我唔想令到大家覺得發完個夢就淨係驚，要有啲得著，可以成就到而家嘅自己。」

超另類歌詞元素

在歌詞方面，柳應廷嘗試將更多創新元素融入其中，例如「螞蟻腦」和「人皮遺囑」這樣的獨特概念。他解釋說：「對比《筆觸男孩憂鬱之死》有少少Funky得嚟，再會有少少Brass，今次《約齊靈魂在墳墓開生日派對》嘅好玩之處，在於歌詞帶聽眾進入一個靈魂嘅世界，聽嘅時候要代入成個故事，由副歌開始見到嘅『螞蟻腦』、『人皮遺囑』，相信都係大家未必見過嘅事物，但全部都係喺我個腦嘅幻想空間裡面。」

大膽怪誕造型呈現！

為了更好地呈現歌曲的風格，柳應廷在拍攝音樂錄影帶和封面時也大膽嘗試新的造型。他說：「單曲封面用咗一個比較日系武士妝。坊間多數歌手嘅Cover都係乾淨俐落靚仔，既然今年玩玩味，不如玩盡啲，妝容上都做個突破啲，希望大家望到呢個樣就諗到呢首歌，所以造型上今次妝容，就係發惡夢嗰個人嘅感覺。」至於即將推出的音樂錄影帶，柳應廷揚言將會保持其一貫的古怪風格，並加入更多色彩和對比強烈的元素。