2024香港小姐競選塞班島外景拍攝盛況：佳麗與魔鬼魚親密接觸

《2024香港小姐競選》的15強外景拍攝已經陸續展開，第二批候選佳麗7號秦冀雯(Yvonne)、8號盧凱怡(Kerry)、12號鍾翠詩(Tracy)日前已出發到塞班島，並由兩位師姐馮盈盈及麥美恩(Mayanne)帶領為外景開工。三位佳麗昨日(22日)行程非常豐富，一大清早便出發沙灘拍攝泳裝鏡頭，之後在兩位師姐陪同下，齊齊與魔鬼魚作零距離接觸。以水著上陣的三位佳麗大曬健美身材，與魔鬼魚抱抱兼餵食，玩得不亦樂乎。兩位師姐亦有落場玩埋一份，Mayanne全程表現勁騰雞，拍攝期間有一條魔鬼魚在其腳邊遊過，Mayanne即時嚇破膽露出痛苦表情，場面搞笑。有指親親魔鬼魚會幸運7年，三位佳麗和盈盈聽畢都爭住錫，而細膽的Mayanne為了Good Luck最終亦鼓起勇氣錫錫魔鬼魚。

午餐趣事

馮盈盈、Mayanne與三位師妹共進午餐期間亦發生搞笑事，事緣三位佳麗根據自己口味選擇了喜歡菜式，口味比較獨特的Yvonne竟揀選了苦瓜全餐，就連飲品都是苦瓜汁。之後因為製作組安排，兩位師姐需根據對三位師妹的第一印象為三人分配菜式，結果Kerry被安排品嚐苦瓜全餐，雖然「苦過弟弟」，但 Kerry仍一邊吃一邊露出甜美笑容，相當專業。三位佳麗與盈盈、Mayanne一同受訪，講到是次拍攝泳裝事前有否做好準備？Kerry說：「我哋從參選開始一直都有Keep fit，每個人都好勤力，我發現Tracy同Yvonne都食得少過我。」盈盈聞言大爆Yvonne非常自律，就連飛機餐都親自準備，Yvonne笑言：「我好聽話㗎，大家都叫我減嚇肥，因為上鏡會好睇啲。」Tracy則指不擔心拍泳裝鏡頭：「但我都會食少啲，因為怕有肚腩。」

師姐Mayanne泳裝趣談

至於師姐級的Mayanne則搞笑說：「咁想睇我哋著泳裝咩？有咩好睇，十幾年前咪著過囉！」盈盈笑言：「都有做啲準備，但全部(泳衣)都係好運動型，唔會 走光，好安全。」Mayanne聞言再搞Gag謂：「我帶咗我媽套泳衣嚟，簡稱面堅尼，由頭遮到尾，美白好緊要呀！」講到Mayanne和Tracy同樣來自溫哥華，問到有否經驗分享給師妹？Mayanne說：「其實我已經變咗一個港女，你(Tracy) Feel唔Feel到我仲有溫哥華特質？」Tracy聞言明明想向師姐笠高帽，但卻被其餘四人誤解為爆Mayanne多嘴，場面搞笑；Tracy其實是這樣說的：「有(溫哥華特質)呀，就係好多嘢講，可以有好多話題，呢樣好好。」