面懵心精甜筒輝 轉型YouTuber

佢曾經係星爺御用綠葉王，亦係《食神》、《行運一條龍》、《喜劇之王》嘅場記、編劇及副導演。因為天生個樣「XX懵懵食甜筒」，佢被《十兄弟》嘅副導演起咗個花名甜筒輝，到《食神》時，星爺重將佢由幕後帶到幕前。

上年輝哥加入網絡媒體，做埋YouTuber，重喺YouTuber新秀比賽「香港最強CREATOR新秀戰2014」中奪得第5名。「我個樣懵啫，但我都知道，媒體急劇轉型，乜都要上網㗎啦！」輝哥邊說邊笑，笑得實在很——傻。

text – Jessie photo – Jacy、由被訪者提供

甜筒輝YouTube Channel：
https://www.youtube.com/user/timtonfai2014/videos

鍾意玩如花

得罪講句，輝哥笑同唔笑，個樣都十分之懵。跟出名鍾意整蠱人嘅星爺做嘢，會唔會被佢玩到反轉？

輝哥話星爺喺現實都係「整蠱之王」。「同佢共事幾部電影都有被整蠱。好似《食神》度橋寫劇本嗰幾個月，周生（星爺班底嘅叫法）每晚都會拉隊食飯兼落酒吧飲嘢。佢知我唔識飲酒，有次就同酒保夾定，喺我杯橙汁加烈酒，我飲咗兩啖就wing wing哋，最後重瞓着咗。

「另1次就係再早期啲，李力持第1次帶我去探《大內密探零零發》班，周生同班crew啱啱食完消夜，重有碗魚蛋粉剩就俾我食。嗰次係第1次見周生，佢竟然叫我喺佢面前食晒碗魚蛋粉，俾我對筷子重要係攣嘅，勁難用，佢見到我嘅狼狽樣，就全程牛咁眼望住我。我緊張到不得了，對手震住咁食。佢見我愈緊張，就『啤』得重『行』，結果我對手愈嚟愈震，好辛苦先食晒碗粉。不過其實佢同我合作一段時間後，都知我係好拘謹嘅人，唔多玩得，而就算玩，我亦唔會出現乜嘢爆笑效果，所以佢都係鍾意玩『如花』李健仁多啲。」

被星爺鬧粉腸

當初輝哥一直都做幕後，直到拍《食神》最初都係，但有日星爺突然問佢屋企有冇西裝，叫佢第2日着返工，原來星爺睇中佢個樣夠懵，叫佢客串雙碩士學位傻仔嘅角色。「我前1日先知道要演戲，於是就度咗段對白俾自己，詳細唔記得，總之係用嚟形容個杯麵。我睇人演戲就睇得多，但到自己出鏡時，先知自己好鬼怯場，口窒窒講唔到對白。周生當時有少少火，話：『你條粉腸，自己度嘅對白都講唔掂！』跟住走開一陣，返嚟就話唔好講嗰拃對白喇！原來佢度過啲新嘢我講：『美美美國哈佛大學、英國劍劍劍橋大學』，呢句就係其中周生即場度俾我嘅對白。佢話你條友仔口吃吖嘛！我就俾你演個口窒窒嘅角色，實好自然啦！」

輝哥重話星爺轉數超快，每場戲嘅細節，佢都係幾日前先詳細咁諗，甚至現場再諗，重會經常加減戲中小角色。「佢成日諗身邊除咗正規演員，重有咩人可以加落套戲度。《食神》入面咪有場成班人排開輪流講『不如溝埋嚟做瀨尿牛丸吖笨』嘅？其實有部分都係劇組啲人嚟。」

傳授喜劇心得

跟喺星爺呢種轉數咁快嘅人身邊，每秒都要提高警覺，輝哥就試過爭啲出事。「《食神》有場戲講一群有厭食症嘅人衝入鋪狂食瀨尿牛丸，我當時係副導演，要負責搵批好瘦嘅臨記，但臨記公司搵嚟嘅都唔夠瘦。星爺見到呢班cast，本來準備發火，好在如花發現呢件事，即時喺拍攝現場附近搵咗啲道友，俾每人2、300蚊嚟頂替，好彩最後都被佢搵到幾個好瘦嘅，最後我先逃過一劫。」

不過輝哥話同星爺做嘢，真係可以學到好多嘢。「拍《食神》時，星爺突然有日私底下教咗我一啲喜劇處理嘅秘訣，喺呢度當然唔可以公開啦！雖然出面話佢好刻薄，但佢對我算係咁，合作期間冇乜鬧過我，重幾客氣。其實我覺得佢只係比較自我，我都係呢種人，好理解佢，所以我更識睇佢眉頭眼額，知道幾時可以同佢講嘢，幾時唔適合。後來《少林足球》上映，佢搵有線電視幫手做宣傳，我嗰時喺有線度做，見番面都有講有笑。」

李力持：「阿輝抵得諗！」

輝哥師傅李力持，話當初揀咗輝哥，係因為佢唔怕蝕底。「好多時新人一入行就會問我可以搵到幾多錢，成日希望一步登天，不過阿輝就唔會計較呢啲嘢，大學畢業放棄銀行高薪厚職入電影圈，可以睇得出佢好有決心。而且佢好勤力又肯接受挑戰，喺佢跟我嗰幾年入面，都冇被我哋趕走，就證明佢真係好捱得同埋好抵得諗。拍《喜劇之王》，要佢做收陀地嗰段戲，其實都幾艱辛，要被摑之餘，因為我同周星馳要求都好嚴，通常我或星爺會親自示範，演員嘅動作同語氣都要跟番，對冇乜演戲經驗嘅佢嚟講，能夠完成到都算幾好喇！」

低B樣高才生

輝哥天生懵樣，真係估佢唔到原來係個高才生，A-level有1A2B，重入埋港大，畢業後就被大銀行請咗。不過佢話見到啲同業前輩日日返工放工咁悶，覺得唔對路。「我想做電影編劇，就報讀永勝電影公司編劇訓練班，當時向華勝自己、王晶、陳可辛、陳嘉上都有嚟教書。」

訓練班畢業之後，李力持喺全班30幾人入面揀咗輝哥跟佢學做編劇。「我估係因為當時電腦未普及，但我喺銀行工作時已熟用，所以我係少有打字寫劇本嘅人，重會加少少graphics，出嚟嘅嘢較為清晰，所以先吸引到李力持。」輝哥第1套戲係喺上海拍嘅《十兄弟》，當時佢做場記。「嗰時試過成班幕後夾埋叫徐錦江嚟呃我去佢間房，然後徐同我講：『小朋友啱啱入行，有啲嘢係要付出嘅。』意指要我同佢發生關係，我當時驚到爆，即刻衝咗出房，見到大家喺晒出面，先知原來係整蠱緊我。

「返到香港之後，星爺拍緊谷德昭嘅《大內密探零零發》，李力持帶我去探班，順便介紹星爺俾我識。嗰套戲之後，星爺自己開公司，準備開拍《食神》，李力持擔正做導演，因為我跟開佢，所以就順勢安排我入去做場記、副導演同編劇，嗰刻就正式參與星爺啲戲。」

創業失敗崩潰

同星爺合作至《喜劇之王》尾聲時，輝哥經谷德昭介紹，去咗有線做動畫《衰仔樂園》粵語配音版嘅創作總監，之後重身兼報紙副刊編輯。「當時兼任兩份工，根本已經唔夠時間用，所以推咗好多電影嘅邀約，本來星爺都有叫我客串《少林足球》，但工作正喺搏殺期，所以婉拒咗，之後其實都有啲後悔。」

日頭夜晚打兩份工嘅時間維持咗3年，佢跟住再跳去少年雜誌《TEENS》做搞笑漫畫編劇。「當時由漫畫《Miss Sex》嘅漫畫家李勉之繪畫，漫畫頭兩期單行本都大賣，所以個心好雄，覺得自己可以自立門戶，就同幾個朋友一齊自資出咗本叫《Punch》嘅漫畫雜誌。但嗰時年少氣盛又冇經驗，結果一敗塗地，崩潰咗成個月，日日都足不出戶，要屋企人照顧。」

轉做YouTuber

輝哥振作番之後，就同另1出版社合作出《爆笑王》漫畫，一做10年，其中6年長駐深圳。但囡囡13年要返港讀幼稚園，所以回流返港，近年紙媒沒落，盈利不停下降，輝哥話要諗計轉型。上年佢就加入1間網絡媒體做編輯，同時亦開始拍片放上YouTube。「做呢份工之前，我完全唔識咩係YouTube。返工嘅第1日，同事就同我講一定要摸清楚YouTube呢樣嘢。當我開始了解呢個平台，發現比電影互動好多，因為可以留comment，直接知道觀眾反應。我就拍咗第1條片《跆拳少女打傻賊》放上去，之後重參加『香港最強CREATOR新秀戰2014』，最終得到第5名。」

輝哥話以前覺得電影最高高在上，對其他媒介完全不屑一顧。但而家發現YouTube效果更強，拍咩都得，可以好「任性」咁做實驗試反應。「我而家都重係摸索緊短片嘅節奏，同點先最能迎合大眾口味。我做YouTuber其實都係train緊自己編與導嘅能力，最終目標始終係電影。」

預告片：

http://www.youtube.com/watch?v=lkXtLjLW4ac