39歲關智斌唯美寫真集《尋蝶戀花》內容率先睇 魔鬼式操肌！
撰文、圖片：東方新地丨原文刊於：東方新地丨編輯：白子
關智斌事隔13年再出寫真集
關智斌（Kenny）入行十七年，由歌手發展到演員，他對工作全情投入，由內至外都一直保持完美狀態，靚仔樣固然要keep，身材亦唔可以忽視。自26歲出過《尋找美惠》寫真集後，他一直念念不忘，去年開完紅館個唱，他開始著手籌備和策劃新的寫真集，終於在2020這個盛夏推出《尋蝶戀花》。
赴日前做足準備
Kenny是完美主義者，為了以最弗狀態示人，赴日拍攝前他日夜魔鬼式自我加操，胸肌脹卜卜，手臂愈來愈粗，「男神」以十四個不同的造型，道盡無數個成長中不同的情緒和故事。據知情者透露：「Kenny真係好緊張自己身形唔靚，今次寫真集雖然比較藝術，其實唔會有太多露肉相，但浸溫泉同濕身透視都要有美感，Kenny想身形keep住結實，完全冇疏懶，去健身室搵教練之餘，仲自己喺屋企狂操，佢愈操愈大隻，狀態真係超好。」
個唱勾起回憶靠寫真尋回自己
記：本刊記者 關：關智斌
記：點解會喺今年出寫真集？
關：其實我喺06年嘅時候，出咗一隻專輯連寫真集《尋找美惠》。我記得上年演唱會嘅時候，我唱番好多呢隻專輯嘅歌，因為呢隻專輯當時係一隻概念專輯，以「尋找」作為主題。而 喺演唱會之後，好多人都對當中嘅歌有回響，於是就諗其實經過咗咁多年，喺呢個尋找嘅過程，有冇尋找到呢？或者其實尋找嘅係咪真係一個人呢？究竟點樣再去探索自己呢？於是引申咗呢個《尋蝶戀花》寫真集，有少少係延續上次《尋找美惠》，事過境遷隔咗咁多年之後，究竟我喺呢個尋找嘅過程入面，有啲乜嘢得著呢？
記：今次本寫真，最想呈現到乜嘢畀大家睇？
關：其實我想講喺呢十幾年裡面，自己一啲成長嘅體會、對於一啲夢想嘅追求，同埋對於一啲理想嘅睇法，所以點解叫《尋蝶戀花》，「蝶」係有蝴蝶破繭而出嘅意思、繁花盛放嘅一個感覺，所以我希望會呈現到畀大家睇經過呢十幾年嚟自己嘅一個成長，就用咗蝴蝶同花去呈現。
與新晉女攝影師有火花
記：整個拍攝有乜嘢係最難忘？
關：其實有好多部分都好難忘，最難忘係今次嘅攝影師羅豆，佢係一個新晉嘅女攝影師，曾經喺日本跟大師學藝，所以佢呈現出嚟嘅風格係好配合我今次喺東京嘅主題。今次拍攝取景嘅地方除咗我哋睇開嘅東京，佢搵咗好多好特別嘅地方，而我哋喺東京成日去玩嘅時候都冇發掘過嘅，佢帶咗我哋去伊豆一個好有特色、好古舊又有啲詭異美麗嘅一間酒店；又去咗一個叫「大島」嘅地方，我亦都冇諗過日本竟然有啲好似火星、沙漠咁嘅地方，所以整個拍攝過程入面，location對我嚟講其實係幾難忘。
記：咁有冇遇到有趣嘅事？
關：其實成個拍攝過程都好有趣，大家喺鏡頭前睇到我哋一啲好靚嘅相，其實背後過程都有少少辛酸。首先當時天氣都幾凍，然後又會黐一啲蝴蝶標本喺身上，同埋我又要含住朵花喺個口去影相，呢啲都幾有趣。每日收咗工之後，我哋一大班工作人員都會齊齊去食好多嘢、飲吓酒，成個過程好開心，因為成個團隊都真係好好玩。
記：你自己最鍾意邊張相？或者係邊一part？點解？
關：我自己最鍾意係喺溫泉，有半邊面浸咗喺水嗰度嗰一part，其實嗰一part唔係好辛苦，因為啲水好彩係暖，不過我覺得喺成個水池入面擺咗好多好靚、日本當造嘅花，後面又有幅好靚嘅壁畫係一個富士山，成個意境好代表到日本嘅文化，成個構圖好靚，我最鍾意呢輯相。但如果係最難嘅一輯，就應該係「弓道」，因為當日真係有個老師教我點樣去擺嗰啲姿勢，日本人學嘢真係會用好多時間心機去學，所以其實嗰啲姿勢真係唔係一時三刻就可以擺到出嚟，嗰日嘅學習過程，老師都幾惡，我又要好快又要投入到個狀態，所以嗰一part「弓道」嘅相，應該係最辛苦。不過影出嚟嘅效果真係有嗰種「弓道」嘅感覺、係一個再出發嘅感覺，睇番啲相我覺得真係好滿意。
今時今日，出寫真已非女藝人專利，有樣有身材的Kenny兩度出寫真，而且深受粉絲歡迎，證明美男一樣可以吸睛。今年因為疫情關係大家冇得出外去旅行，咁就等Kenny帶大家眼睛去旅行啦！
