《愛回家》鄺潔楹被監製當眾插戲屎扭計唔續約高層出馬留人

28歲鄺潔楹（Judy）2014年西雅圖大學商業經濟學學士畢業，嫌朝9晚5辦公室生活過於沉悶，所以加入娛樂圈。原本只是無綫一個主持仔，後來因拍旅遊節目《 3日2夜》大晒身材爆紅，之後再被安排殺入高收視的《愛‧回家之開心速遞》，入行四年，有身材冇高度一樣可以成為宅男女神。樣靚有著數，不過演技唔掂始終失分，據知鄺潔楹曾被某監製當眾嘲諷演技不堪入目，對她打擊甚大，打算約滿後離巢另謀發展。

撰文、圖片：東方新地／IG｜編輯：Evita（原文刊於：東方新地）

鄺潔楹被監製插戲屎身高阻礙演藝路

無綫小花競爭大，有樣有身材都要有運，鄺潔楹身高僅得155cm身高，16年簽約成為無綫親生女，由娛樂台主持仔做起，拍《 3日2夜》穿水著初露光芒，再被安排空降入處境劇《愛‧回家之開心速遞》，飾演大學女神 Venus。

其實除了戲屎令監製卻步，鄺潔楹早前上 Do姐的電台節目，亦坦言身高令她受盡冷言冷語，曾有幕後說以她的條件，只可在幕前生存一年半載，幸好鄺潔楹未有上心，她積極工作，以行動去證明哈比人一族同樣有市場。

高層出馬游說加入《七公主》

甜美樣貌令鄺潔楹戲裡戲外都令一班宅男神魂顛倒，不過演技就差強人意，甚至被指是花瓶，據知情者透露：「 Judy（鄺潔楹）演戲經驗由零開始，入到《愛‧回家》就現晒形，好多監製都覺得佢得個樣，完全唔識做戲，所以甚少人搵佢開劇；早前佢上 Do姐個電台節目，坦言曾經有監製兜口兜面同佢講有睇《愛‧回家》，不過就彈佢啲戲屎到不得了，仲話如果唔係老婆要睇，真係會熄電視。Judy聽完真係大受打擊，亦終於明白點解呢幾年都冇乜劇拍，來來去去都係做主持多，到早前公司搵佢傾續約，Judy表明好想拍劇，亦會搵老師學戲，如果再冇機會就考慮轉行唔續約。公司即時安撫佢會認真研究，冇幾耐監製陳維冠就搵 Judy拍《七公主》喇！Judy近月好畀心機拍劇，佢想有好表現，令當日話佢戲屎嗰位監製跌眼鏡。」