鄭中基相隔11年親自拍片向椋名凜道歉 轉投ViuTV拍劇做慈父！｜頭號粉絲
撰文：東方新地、八卦妹（原文刊於：東方新地）｜圖片來源：東方新地、機動電視台RTV截圖、椋名凜IG｜影片來源：機動電視台RTV
鄭中基唔幫無綫 睇中ViuTV
近日無綫劇集收視創新高，ViuTV自家製作一樣搶fo，可謂各自各精彩，ViuTV繼劇集《二月廿九》、《教束》網民勁Like之後，將再有實力藝人幫拖，去年梁漢文拍完劇集《假設性無罪》後，好兄弟鄭中基原來亦會幫Viu拍劇。其實早在上年初在港舉行演唱會，Ronald 已在台上放聲氣表示有意再拍電視節目，當時大家都估計他會再幫無綫拍《美女廚房》，不過他卻漏口風透露電視台唔止得無綫，仲有ViuTV，果然唔係齋Talk；咁又係，兩個好拍檔方力申及梁漢文都先後幫ViuTV做主持，梁漢文去年更拍埋劇集，鄭中基睇中Viu亦無可厚非。
唔肯再做《美女廚房》劇癮起做慈父
據知情者透露：「其實上年年中ViuTV籌備開拍效法無綫《美女廚房》嘅遊戲烹飪節目，已經傾Ronald做主持，但Ronald就講明再做一定要搵埋小方、Edmond（梁漢文）一齊合作先拍，當年《美女廚房》大受歡迎，呢個鐵三角合體好貴，而且Viu嗰邊亦唔想完全copy無綫節目舊瓶新酒，最終傾唔成，不過Ronald放聲氣願意拍劇，對Viu嚟講絕對係好消息，睇番Ronald擔正拍劇，已經係02年嘅《我要fit一fit》，近年佢喺電影發展順利，再拍劇幾乎冇乜可能，不過Viu就畀好大自由度佢，角色亦為佢度身訂造，上年游學修監製ViuTV劇集《仇老爺爺》，已經搵過Ronald客串一集，今次Viu斟Ronald合作，角色好討好，係個任勞任怨嘅慈父角色，佢睇完劇本超級鍾意！」早已是廿四孝慈父的鄭中基，當然好願意將自己真實一面同觀眾分享，難怪ViuTV能夠成功打動他再拍劇！
親自拍片 在個人Youtube Channel內向椋名凜道歉
提到昔日無綫熱門節目《美女廚房》，當然不得不提日本模特兒椋名凜與炮製的臭豆辣椒蝦及喇沙米粉，當年椋名凜憑著「出色」的廚藝，單靠臭豆就成功令自己躋身「地獄廚神」的行列，一眾主持人都要戴著口罩去試食，可想而知究竟有臭。
事隔11年，鄭中基在個人的Youtube頻道《機動電視台RTV》中重提椋名凜一事，並大爆開拍節目前，就已先向眾參賽者表明立場：「因為我唔食冬菇同蝦醬，次次都會同參賽者講明，點知佢日本人，聽唔明我講嘢。佢落咗成嚿蝦膏，成碟嘢就好似沼澤撈出嚟嘅不明物體，灰灰綠綠，灰綠色，好臭，但一定要試食，我唯有隔住口罩食，雖然食唔到，但好臭。」
但原來完成錄影後，鄭中基自覺在拍攝期間的評語太苛刻，覺得不好意思，欲意向椋名凜道歉，只可惜對方已離開錄影廠：「當時，完廠後就已覺得好似好衰，批評太過苟刻，諗住同椋名凜道歉，點知佢已經走咗，喊住咁走，原來嗰日係佢生日，所以好對唔住！隔咗咁多年先同你講，對唔住！」
雖然如此，昔日的「超級地獄廚神」椋名凜，自2010年與職業車手高村直樹結婚後，至今已有5位小朋友，專心相夫教子，為令孩子有均衡飲食，她一直努力鑽研廚藝，現已變成真正的「美女廚神」，還不時親自下廚炮製心愛美食給家人，十分賢良淑德。
