鄧兆尊瘋狂爆料 被天王級歌手白鴿眼 女星上酒店必紅潛規則
兆尊講近況 教人呢樣
開場主持人叫兆尊講吓近況，原來近排兆尊主持港台「室內運動」節目《老中青當自強》，之後主持發現兆尊剪短了頭髮，兆尊解釋為方便游水就剪短，主持謂：「方便游水… 𥄫嘢係嘛?!」 兆尊大口氣謂：「𥄫嘢？我哋邊使𥄫嘢㗎，係咪先！」更強調依家游水冇乜靚女，泳池常見泳客係阿公阿婆小朋友，好難有嘢𥄫，要𥄫嘢要去沙灘喎！兆尊仲即時派爛gag：「我都好想睇我爸(已故名伶新馬師曾)游水，睇佢游水就出事啦，因為佢會著游泳褲嘛，所以咪會『露出馬腳』囉！」主持即笑謂：「係你先夠膽講！」然後阿祖開始灑鹽花謂：「一代傳一代，如果世伯馬腳夠牙力夠腳力，咁兆尊你都應該真係恭喜恭喜吓！」意指兆尊性能力都唔會差！再談及近兆尊話因為上節目而多咗粉絲，不過他笑謂身邊有「殺氣」所以寶粉唔敢走近佢身邊！
抖音大把女𢱑上門
趁兆尊中途電腦有技術性問題，主持亦介紹當日嘉賓兆尊，指他稍後會談及娛樂圈的事同自爆多姿多采的感情生活，兆尊一返埋位，阿祖即問：「人紅自然有人埋身？」因為兆尊指他在抖音的專頁，不時有除了「水電煤」(代表他三位紅顏知己的稱號)三位外，還有唔少囡囡爭住做佢嘅「差餉各樣」，而當中唔少人私訊時提到自己「好醜樣，同好識使錢」，似乎特別懂得兆尊的重口味？不過兆尊話睇相原來係靚女，可能佢被誤解食女愛食醜女吧！對於呢堆自己送上門的女人，兆尊稱通常唔會回訊，但宥妻室的讀歌王抖膽問兆尊有冇介紹，佢話：「有食唔食，罪大惡極，我已經好罪大惡極，我唔想害你喎！」歌王提議佢做「轉介服務」，因為佢爸係慈善伶王，兆尊話：「人哋食物中毒、食滯咗，我好大鑊喎！」引來全場爆笑！
阿爸傳授雄風秘技
從而延伸到另一主題，歌王話兆尊好奇心旺盛，定必會研究奇難雜症的解決方法，而且會有偏方會讓人「生龍活虎」，而他們齊齊探討的其中一個主題新聞，題為「抖音網民下體曬太陽增性慾 醫生警告可曬傷致癌」，兆尊話最好自己一個曬可以增加運氣，因為「袋x曬」，派完爛gag，佢話喺醫學常識角度上提醒各位：「曬得多皮膚會爆裂，會成日抓，搽太陽油都冇用。」然後開始爆料，指娛圈中有位「好黑、成日曬太陽，最近好多人留意」嘅人，他話見到「佢」其實好辛苦，因為同佢開工時，佢不時要搽baby lotion，避免痕癢同龜裂，網民估計兆尊是講緊係古天樂。再被問到有冇聽過重振雄風的方法，他笑謂：「我爸爸12、3歲時整鬼我，教我話如果將來想要男性雄風，就用筷子敲下體，我就傻仔跟住做，我爸係個演員嚟㗎，佢講啲嘢真係害我好多！」
點名讚圈中最佳經理人
談到近日有網民爆料指MIRROR經理人公司惡頂唔專業，主持問兆尊是否真的有情況是，藝人紅透半邊天，經理人變得獨大一句「我唔想」就影響到公司計劃，兆尊謂：「如果我係經理人，揸住MIRROR呢隊人，少不免都會先著眼喺油水(利益)上，你俾邊著數我呢？呢樣係一定會發生嘅，任何事都要睇清楚合約先簽，點解經理人鍾意簽後生仔，因為佢哋好多唔識睇合約。」佢爆料曾經有次在雲頂登台，有某藝人經理人坐地起價，當時主辦商已做晒宣傳，都唯有就範，而該藝人則被蒙在鼓裡，完全唔知情，他話類似事件時有發生：「人哋唔差在嗰少少錢，但下次咪唔搵你囉，有啲廿萬唱三首歌，呢個地方個名臭咗咪去第度囉，尤其巡迴演唱，好似美國咁，巡迴都可以去十個地方啦！」主持認為兆尊幾適合做經理人問佢有冇興趣，佢笑謂：「志偉搵過我做，但我唔做，我冇咁多時間！嗰陣佢叫我返大陸，我國語唔係咁好，又冇返過去怕唔勝任，整衰佢個名，仲要飛嚟飛去。」被問到圈中的最佳經理人，他點名黃柏高Paco：「因為佢從來都在醉酒狀態冇清醒過，門面擺得好好，同佢傾嘢乜都話好，但第日可以話醉咗唔記得，佢自己講啫嘛，佢假醉啫嘛！」
兆尊俾紅星白鴿眼
他憶述以前曾經遇過一個極囂張的當紅藝人，撞見自己會刻意扮看不到：「試過一個歌星都紅嘅，出過兩、三隻碟咁樣，大家明明都好friend嘅。有次喺TVB撞到佢，我行過佢睇我唔到，可能佢扭親條頸，好彩當時TVB有個梳化同事同我講：『哼，呢啲好快打柴㗎！』不出半年，真係跌晒落嚟。」他透露對方本身好高級數，新秀出身，只比四大天王級數低些，而且是與自己差唔多年紀，雖然他堅決不講名字，但已經引發網民熱烈討論，抽出嫌疑人為梁漢文、蘇永康、杜德偉、許志安和鄭秀文等。之後談到走紅條件，兆尊舉了幾個例：有背景、有才華但要謙虛同肯蝕底，然後又爆自己老友料：「我有個朋友，當年爆紅之後，俾公司老闆要求去卡拉OK陪唱娛賓，但她過唔到呢關，所以紅唔到，人哋傾生意，你就旁邊唱歌娛賓，佢過唔到自己，唔唱就唔捧囉，就係咁！」呢位朋友呼之欲出就是早前都上過節目做嘉賓主持的趙學而，兆尊強調其他人「陪唱」後有冇下文就唔清楚喇！
走紅潛規則
節目又提到「玻璃朱」朱庭萱早前參加TVB歌唱比賽《中年好聲音》，她不滿遲遲未收到面試通知而質疑TVB可能會篩選參賽者的參賽資格，鄧兆尊笑言唔知道誰是玻璃朱，但他亦為前公司TVB平反：「呢個我一定要幫TVB講，TVB係好公平嘅，任何人你只要寫信去，一定有機會，佢會篩選，你都睇到啦，會排晒隊海選，唔會話識高層就會好啲嘅，我背景咁好都係由低做起咋，我都係2,500蚊一個月，做嗰啲二打六做起咋！」玻璃朱又在社交網發文表示最終要向高層朋友查詢被安排面試，鄧兆尊聽罷則她做漏了一件事：「佢搵得高層就做漏一樣嘢，就係『培訓』！」他又強調自己所講的是「培訓」而非「陪瞓」：「話畀你聽畀條捷徑你行啦，你去多啲紅磡，嗰頭有間酒店，你出入多啲就會紅得好快，喺黃埔入面，去多啲嗰間啦，嗰度好多高層出入啊！唔好問點解，嗰度好多training，你去嗰度得㗎喇！」
