《過時·過節》︳毛舜筠呂爵安母子檔下廚 Edan表現超可愛

毛姐帶Edan祖堯煮飯仔 一齊慶生

毛姐生日正日上載「毛姐飯堂之《過時·過節》生日飯聚」新片，獲藍帶廚藝認證的毛姐親自下廚，由兩位助手Edan和祖堯一齊下廚，宴請《過》片導演曾慶宏、「表姐」Angela、藝術總監文念中，毛姐和Edan更邀得共同好友古天樂任神秘嘉賓作客，場面溫馨又熱鬧。眾人一邊品嘗Mo姐特意創作的料理，更大談電影。Edan同場更為一眾10月及11月生日的壽星古仔、Angela、祖堯及（11月5日）生日的阿媽毛姐送上蛋糕慶祝。

「災難級別」廚神Edan不忘搞笑

Edan自告奮勇出任廚房助手，但表現雞手鴨腳，被祖堯形容為「災難級別」。而一向充滿好奇心的Edan，下廚過程中問咗唔少令人意想不到的問題，如毛姐介紹以泰安雞用作手撕雞的食材，Edan卻問：「咁有冇爵安雞？」令毛姐哭笑不得地問：「你想做雞？」下廚過程充滿歡樂。而當毛姐提醒Edan戴手套，準備處理「雞絲粉皮」時，Edan真心問毛姐：「兩隻手都要戴？」毛姐也沒好氣地回應「你用兩隻手撕喎！」

大談電影心路歷程 Edan：最緊張嘅一部電影

下廚期間，眾人大談拍攝《過》片的心路歷程，Edan坦言：「《過時‧過節》係入行已嚟最緊張嘅一部，又冇安全感，因為唔係自己一貫做開嘅類型，擔心自己一個人會破壞整部電影。真係好lost，初時自己只係識好細聲講嘢，但毛姐提我講大聲啲同清楚啲，之後佢同我惡補每一句，之後再約埋去導演度，逐句逐句去研究，應該點樣講。」毛姐則搞笑追問Edan，「你平時係咪講開英文？」Edan卻幽默回應：「我平時唔講嘢！」Edan表示拍了《過》片後，對屋企的價值觀有所反思，他指：「你一出世，嗰啲就係你嘅家人，呢個連結就係一世。通常對屋企人永遠都係最差嘅一面。」毛姐也大表認同：「對屋企人係最真實嘅一面，唔使保留。」

古生大讚毛姐：好有心！

毛姐一手一腳炮製的「毛姐飯堂之《過時·過節》生日飯聚」，親自出馬撰寫菜單、準備食材及下廚，菜式包括「手撕雞青瓜撈生酮粉皮芥末醬」、「鹹蛋黃釀叉燒」、「慢煮秘製鼓油雞釀法國鵝肝」及「鮑魚海參金蠔花菇炆五層肉」等，每一道都是毛姐誠意之作，花盡心思讓每一位來賓都留下美好回憶。嘉賓古天樂、導演曾慶宏、Angela及文念中亦吃得津津有味，古天樂除了大讚毛姐對廚藝的追求，更大讚毛姐對香港電影的熱情，他表示：「唔係呢餐飯咁簡單，係佢對香港電影業嘅熱愛，我哋香港嘅電影業做得好辛苦，但佢仲有心咁去整一餐飯，鋪排咁多嘢，佢唔係淨係呢部戲喎，所有佢主演嘅戲都係咁做。我最敬佩佢係願意同新人合作，帶動啲新人，所以佢同我講起呢部戲，我話（支持）絕對冇問題，同埋你問我， 我哋都想香港電影業好，所以我哋必須攜手努力做好佢。」最後他發起大家向毛姐敬酒，多謝她的付出和努力。

完整影片：