YouTube頻道｜一哥之爭《試當真》vs《微辣》 始祖一哥竟被評為老人台漸變TVB？

少年江流：抵你哋班觀眾去晒睇《試當真》

熱門YouTube頻道《微辣Manner》、《試當真Trial & Error》經常被網民拎嚟比較，一個係YouTube界始祖，另一個就只係開咗年幾2年的頻道，點解網民總係喜歡拎嚟比較？前者擁有72.9萬訂閱者，後者42.8萬，要比都應該比擁有65.1萬同樣為始祖的「熊仔頭」《FHProductionHK》？原因網上好多網民都發起咗「自從有「試當真」 就無再睇《微辣》」的討論，就連《微辣》自己內部成員「少年江流阿丞」都喺影片「微辣笑林寺」中將《試當真》比較，而且《試當真》更奪得2021年熱門創作者第1位！到底《試當真》的片有咩咁厲害取代《微辣》成為新一哥？

《微辣》橋已盡？！似足TVB不停用翻炒舊橋 消費盡觀眾

《微辣》起家全憑2014年一條《買雪糕不能夠分心》9秒短片爆紅，其後大搞搞笑短片、綜藝、音樂劇埸、力捧自家藝人愈做愈厲害，英文字幕、短時間爆出位創意都係其影片特色。不過橋係咪真係會有用盡的一日？只見近年《微辣》的影片不斷翻炒，變公式化，劇情片簡單笑位但不斷出續集消費盡觀眾如《作家的煩惱》、《黑店系列：你有遇過這樣的紋身師嗎》等。綜藝影片愈來愈類近TVB獎門人系列，玩「大電視」「估歌仔」，再唔係就不斷拍《微辣大排檔》一班人瘋狂飲酒，講一大堆「in-joke」，唔少網民表示好似睇緊飲酒台咁。同一條橋玩太多年，觀眾自然會悶，網民都表示：「短片以前就抄vine，而家就抄抖音，綜藝就由頭到尾全部抄tvb/獎門人/娛百」「其實嚟嚟去去都係抄橋玩低俗，想行年輕人路線但又撞正政治唔敢再食抽水條橋。」

試當真同一條橋都可以有新鮮感

相比之下，《試當真》的影片創意度都比較更大，不會時刻重複濫製消費盡觀眾，初創台時推出的《channl需要系列》一反以往youtube劇情片，以偽紀錄片形式推出，帶比觀眾新鮮感。雖然《試當真》亦有重複用橋的時候例如《Uber爸爸 》系列、《大家又咁話》等，但實際表達的意思卻大有不同，而且俾觀眾有層層遞進之感，觀眾唔覺得自己被再次消費之餘，仲會留言驚無下一集，例如《Uber爸爸3 》：「呢個系列真係好正，永遠睇唔厭，就算明知有重複上一集嘅對白，係睇下今集做邊行，都好期待，今集阿哥雖然無對白，但終於有發揮，好正」「用同一條橋都可以咁創新同令人睇得咁投入，真係好勁！」「本身好驚呢集終於穿然後冇得期待新一集 好彩都係未穿😂呢系列真係好好笑」

幽默感貫徹始終 過時不到位

《微辣》劇情影片主要特色以短時間內令人意想不到做出幽默感、爆炸性以及共嗚感，雖然呢種方式的確有市場，可惜當觀眾睇愈來愈多的影片時，單靠呢種方式去取悅觀眾，會唔會已經過時，令觀眾年齡層上升？又或者創意度夠唔夠同其他同類型的影片競爭？網民都指：「早年啲片係幾好睇」「啲短嘅片一開始都會睇吓，但出咗大排檔之後就開始無睇」。《試當真》就完全相反，著重劇情的鋪排同推進再引發笑點，探討社會問題引人思考，基本影片長度好多都長達10分鐘。如果話《試當真》係現今的歡樂今宵，《微辣》應該會更適合，因為影片只用於休閒、放鬆大腦、易入口。好多網民比較之下都表示：「微辣低級趣味」「呢半年都無睇過微辣了，睇得多好悶，嚟嚟去去都係果班人，又拍埋中二病長片，嚟嚟去去都係玩cp笑話」「試當真啲女又正，又敢抽水，啲片高質過微辣」「香港人玩黑色幽默係有一手」「試當真嗰種慢慢推出嚟嘅風趣幽默真係好正，當你睇得太多好爆炸性低質既短片嘅時候，其實你自己都會失去咗觀賞好片嘅意欲」「到呢幾年youtube競爭變大啦，暴龍哥，試當真呢啲個個真材實料都上哂去，結果俾人打x到xx」「有樣嘢好值得讚賞嘅係佢哋唔只提供娛樂，其實係嘗試緊拉高香港人嘅文化修養。例如久唔久都會有電影推介，啲plot又會參考啲過往好評嘅作品，平時嘅片都好experimental，好有新鮮感。所以其他仲係食緊老本嘅channel都要諗諗計了。」早前《微辣》推出影片《非黑即白》系列，意想打破以往創作手法，不過似乎效果不大。

《試當真》更識同觀眾互動交手

YouTube頻道其實都有一樣特色，就係比電視、電影呢啲媒體更加多同觀眾互動，營造出Youtuber比較起明星令人感覺更加貼地同近距離。《試當真》定時定候開直播，又會俾觀眾投票最喜歡的影片，喺《試當真謝票場》同觀眾大講影片製作概念，感謝觀眾支持等，仲開設一個系列叫「編劇試當真」俾觀眾投稿發揮，會員頻道更加拉近同觀眾的距離，大方講《試當真》內部運作、創作概念、藝人動向。而《微辣》相對之下就明顯得比下去，雖然有類似《你見過這樣的導演嗎》投出最好影片，平日亦有藝人做直播，但觀眾最投入參與互動已經係上年《我可能不會拍戲》系列時公開討論同投選最喜歡影片。而且會員制度更被評為「物不所值」－「個plan叫人課金3舊水一個月，個回報係有得睇六毫子有問必答大會」

View this post on Instagram

A post shared by 試當真 Trial & Error (@trialanderror924)

《微辣》藝人形象插水 唔再討好觀眾

以前唔少人都大讚《微辣》捧藝人有力，識揀人討好觀眾，將一眾素人捧紅，好似豪dee、加蔥、多姐、yelo、Rachel、霍哥等人。可惜除咗近年內部時非不斷，仲爆出好多藝人黑歷史，形象大受影響，其藝人無論係演技定係綜藝上都唔見有突破。唔少網民都認為：「本身就麻麻地鍾意，班女好MK」「個人認為佢哋所謂嘅「藝人 經理人」大部份都無能力/資格做藝人，大多是非醜聞，好多人憎」「撞車啊賣假鞋啊 應該仲有大把料」「嚟嚟去去都係嗰班人，已經睇到厭。啲女又唔夠人靚，玩得越嚟越錫身。」「咩公司都好，亂搞男女關係一定冇好下場」「大文/加蔥果班一朝得志就周圍溝女，老老實實大排檔初初出嗰陣幾好睇嘅，而家不了」「落仔蔥呢度食呢度屙，食完一個又一個」《試當真》相比下藝人形象都相對討好，游學修更有講過自己有特別用心去處理藝人的事務，了解每一位藝人的特性，發展所長，男藝人豪哥、腎仔等演技被受讚賞，討好觀眾，女藝人陳苡臻 Jessica、吳家忻Kayan等更成為廣告寵兒，「試當真啲片高質過微辣好多，女仔就唔講啦 一個Jessica x打哂微辣個班，仔方面，我諗咩霍哥加蔥加埋都唔夠腎仔一個好笑」

試當真其他發展成功：MC $oHo & KidNey

《試當真》除咗短片發展之外，之前搞過《試當真一週年現場版》，推出時創意賣飛已令全城熱討，門票好快就被掃清光，非常受歡迎，周邊產品都賣得非常好。《試當真》更出咗男子組合成MC $oHo & KidNey，由蘇致豪和許賢組成，出咗唔少洗腦歌《係咁先啦》、《Black Mirror》、《跌嘢唔好搵》，《係咁先啦》一出更成為全城熱話，帶動全城熱潮，歌曲不單洗腦易明，歌詞內容亦非常有意思！除此之外，嚟緊仲推出「NTR」NFT項目，展示未來發展以及抱負，唔少粉絲都表示要課金！《微辣》除咗大搞周邊產品出遊戲卡牌、出書等，早年亦有搞過《可能好笑魔術音樂劇場》，以及最近的《微辣笑林寺》不過因為疫情關係而受影響。音樂方面早前有搞過《樹窿音樂會》以及力捧過藝人Rachel出歌，唱cover居多，而《樹窿音樂會》最近3個月前上傳的最新的《樹窿音樂會If You Want Me》影片，只得返81個view數！

《試當真》仍未上熱門

《試當真》睇落真係來勢洶洶，不過《試當真》的影片到而家仲未上到Youtube的熱門影片！相反《微辣》早前好幾套影片仍喺Youtube的熱門影片佔一席位。睇嚟《試當真》如果真係要做現今的歡樂今宵，應該要做啲易入口同消化的影片，葵興森林唔係個個睇得明，照顧唔到家庭觀眾。