繩角丨蘇麗珊新歌隱藏內心黑暗面自爆被狂負評：我俾人inbox問候

蘇麗珊(Ceci)今年加盟華納唱片，推出第三首歌《愛情只是藝術品》，仲要係佢自己親自作曲，當中發生唔少趣事！由演員到歌手，《New Monday》邀請到Ceci分享創作歌曲到自己愛情的經歷，亦回應最近ViuTV劇集《繩角》負評一事！

新歌抒發內心黑暗面

蘇麗珊Ceci第三首新歌《愛情只是藝術品》，表示第一次作曲抒發一些隱藏心中的傷痛同黑暗面，填詞人仲幫佢將首歌推到極致！Ceci期望之後會創作或者唱一啲有關成長經歷的歌曲，回顧之前自己面對唔好事情或情傷，以前會想好孩子氣咁反擊，但坦然自從俾某人點醒「每個人行的路係自己的修道場」，令自己成長咗好多，所以之後想同粉絲一齊分享呢份經歷。

蘇麗珊歌曲用咗藝術家banksy的概念 — 歌曲用咗藝術家banksy的概念（圖片來源：官方提供）

自爆愛情經歷鍾意分析對方行為

蘇麗珊都有試過拍拖時好受傷，去到對方想將佢摧毀的地步，但Ceci都會試圖去理解佢的行為，仲大爆自己係鍾意分析對方行為的人，所以希望呢首歌可以成為聽者的出口。問到鍾意刻骨銘心定淡淡然細水流長的愛情，Ceci就表示佢係「愛是最大權利」的人，認為愛情通常應該會經歷熱戀期，似乎都比較喜歡刻骨銘心的愛情。仲叫粉絲可以留意多啲佢之後的歌曲，因為會更加了解到ceci，用歌去透露自己唔同的感受！

因《繩角》俾人「inbox」問候

對於最近ViuTV劇集《繩角》負評一事，自言無諗過會有咁多人關注自己的演技，仲收到唔少人直接「inbox」大鬧Ceci，不過Ceci都樂觀面對，多謝大家的評論之餘，自己都感到非常唔好意思。Ceci表示一開始接到劇本時都掙扎咗好耐要唔要接呢個角色，因為同自己其實太大出入，早前ig亦有提到「導演給我的指令卻是一種我從未想過的演繹方式」，似乎大家都可以理解多啲ceci呢種新的演技，同呼籲大家支持《繩角》！