艾粒演唱會｜余迪偉被笑性取向怒斥職場蝦人！網民質疑係曲線宣傳？
艾粒演唱會｜相隔4個月再開騷
艾粒演唱會part 2昨晚（10日）首場，少爺占及當奴在舞台上大放笑彈，但似乎演出內容惹怒DJ同事余迪偉。凌晨兩點，余迪偉在社交網發文炮轟艾粒，分享了一張艾粒首場演唱會的相，台上熒幕上是余迪偉的相片，旁寫上「迪偉同你浸溫泉」，余迪偉出po怒斥「Enough is enough! 你哋都玩咗咁多年啦，我都冇出聲咁多年啦，你哋都有頭有面有地位，仲玩？呢張相係我IG嘅，有冇經過我同意上你哋個大台去賺錢呢？呢單嘢係性取向歧視同埋職場歧視！」並tag了少爺占和當奴。
網民：咩年代仲笑人基？
余迪偉發文後即成熱話，網民幫口鬧爆艾粒，「老實講，從來唔覺得好笑」、「支持你出聲表態」、「支持你﹗」、「艾粒咁多年淨係識玩屎屎尿尿屁，支持余迪偉去平機會、知識產權署投訴」、「唔識尊重人，支持割席啦﹗」、「咩年代，仲笑緊人基？」等。
「玩咗咁多年依家先嬲？有可疑！」
艾粒十多年來一直以「迪偉後花園」、「迪偉俱幾部」作為話題，有網民質疑有陰謀，認為余迪偉同艾粒同事兼老友，似為二人宣傳演唱會炒熱話題居多，「講咗咁多年，今時今日先出嚟話嬲？有可疑喎！」、「玩咗咁多年，一直以為你鍾意咁玩法，係咪見呢次開騷無乜noise呀？」、「係咪幫艾粒個騷make noise咋」、「係咪曲線宣傳？」、「其實咁多年來聽佢地笑兜個圈笑你，我個人聽到就覺得你地好朋友！同埋你係好講得笑，一定係大方大量的人。」、「艾粒個個星期都玩，我以為你係唔會介意」、「點睇都係迪奶曲線宣傳啦」、「擺明曲到咁都問係咪真嬲」、「等3點啦，平時5點大家都會見，究竟真嬲定假嬲就聽電台先知」。
粉絲不滿秒速再開騷：唔好一陣又part 3呀
又難怪網民會質疑是曲線宣傳，艾粒去年10月舉行出道20年演唱會《歌頌生命沿途有你艾與粒激情雙星璀璨二十ICHIBAN 香港之夜》，完騷隨即宣傳翌年2月開part 2《Part2 ! 黃鳳女士XYZ銀河道士大匯演》，相隔不足四個月，今年一月未開賣已宣布加場，當時已有粉絲有微言：「幾時先係最後？買完一次又一次飛」、「唔好隔三個月又開part 3」。
