直擊陳豪高度防疫一家五口入超市絕不鬆懈

自今年初疫情開始肆虐，陳豪一秒都冇鬆懈過，除了埋位拍劇或拍照一定要見樣，其餘時間他堅持罩不離口，並刻意與人保持社交距離，生人勿近一樣。為保持仔女身心健康，陳豪陳茵媺不時拉大隊到寓所附近的海灘放電，回家的五分鐘路程都必定戴口罩，日前全家趁平日下午人流少，到銅鑼灣超市掃貨鬆一鬆。陳豪為人謹慎，以身教去保護自己愛的人，絕對是仔女的好榜樣。

撰文：東方新地｜圖：東方新地｜編輯：K.P（原文刊於：東方新地）

陳豪防疫意識高絕不鬆懈

拒絕應酬保持社交距離的陳豪，工作以外唯一的節目就是與家人聚在一起，今年七月中家住南灣的陳豪從寓所望落海灘見無人，一家五口即沖擊南灣中灣，盡情享受陽光與海灘，不過玩還玩，玩完行返屋企只是五分鐘路程，陳豪亦吩咐所有人包括工人都要戴上口罩，小心駛得萬年船。

一家五口避過繁忙時間出動

陳豪早前趁新劇《白色強人II》未開工，三個仔女因疫情要停課，偕陳茵媺帶仔女去銅鑼灣輕鬆一下，據知因為怕星期六、日及假期鬧市人多密集風險高，夫婦二人平時盡量避免帶小朋友外出，當日是閒日下午三時許，避過午飯時間出動，人流不多就最好。陳氏伉儷三年抱三，7歲大仔陳梓燁（AidenJoshua）、5歲二仔陳浩鋒（Nathan Lucas）與4歲細女Camilla一開始跟住陳豪好似操兵咁操入超級市場，未見陳茵媺蹤影，陳豪一直拖實細女Camilla，購物車則由大仔Aiden負責推住，二仔Nathan就乖乖跟住行。

未幾陳茵媺歸隊，細女Camilla即交由媽咪照顧。現場所見，陳豪兩位公子斯文淡定，跟住父母行亦唔會離隊唔會手多多，比起兩位哥哥，Camilla相對比較活潑調皮，見她拉住陳茵媺狂舞狂轉無時停，之後又轉身去搞超市的陳列貨品，陳豪發現後輕聲講一句她就收手，可見陳生陳太以軟功教仔女從不打罵非常成功。行完超市離開時，陳茵媺拖住二仔Nathan與細女Camilla，見到本刊記者即笑到腰果眼揮手打招呼，陳豪連忙say hi，大仔Aiden與二仔Nathan亦跟隨父母禮貌地向記者笑笑揮手，完全感受到陳氏一家待人真誠有禮，再一次印證身教最緊要。