王貽興轉行教風水曲線自誇算得好準 網民斥抽「鑽石山慘案」水：林作2.0
廣告
王貽興過去以作家、才子形像打入電台、電視圈，近年甚少亮相幕前，今年初被發現招收學生，轉行教紫微斗數。上周六鑽石山發生駭人慘案，王貽興出po指「請大家唔好話我好準…呢啲慘劇冇人會希望出現…」，被指曲線讚自己批算準確，被轟消費慘劇，直斥為「林作2.0」。
鑽石山慘案︳王貽興才子變風水佬 開班招收學生
王貽興昨日在社交網出帖，寫道「請大家唔好再提我話我好準，我寧願大家繼續笑我神棍，但件事從來冇發生過，呢啲慘劇冇人會希望出現，一次都嫌多……願死者安息，大家出入平安，呢一年快啲過去。」
鑽石山慘案︳王貽興開班教點部署：大家唔可以獨善其身
而前日王貽興出post時寫指最近真係發生好多事，透露身邊不少人受感情煩惱，前途問題，或家人健康出現問題，因而壓力大到健康情緒出事，王貽興就解釋點解：「除咗因為八運同九運交接嘅年份之外，但凡隔20年嘅癸年，譬如2003癸未年，或者1983癸亥年，咁啱六運轉七運，七運轉八運，以至今年八運轉九運嘅交接年，都會有好多械劫搶掠，血光傷害，倫常慘案、經濟下滑，樓股齊瀉，以至好多名人不幸離開。」王貽興稱會教大家下半年點部署，又指大家唔可以獨善其身，因為「可能只係好彩未輪到自己」，最後提醒大家只餘下少量名額，請大家快啲報名。
鑽石山慘案︳王貽興被網民封為「林作2.0」：大家可以組隊
王貽興呢兩日的post引起網民反感，瘋狂吸嬲，留言洗版鬧爆王貽興對鑽石山慘劇抽水，「除咗保險佬仲有算命佬都鍾意抽水」、「同林作有無乜分別？如果咁準，點解唔一早去避免悲劇發生，算到化唔到？」、「一早算到唔幫受害人趨吉避凶？」、「第一時間衝出嚟讚自己，都幾賤」、「唔好抽水，你唔想件事發生又出po曲線讚自己」、「做作家搵唔到食就咁」、「最衰係我地，二千幾蚊堂都唔報，依家出事啦」、「神棍」、「係咁準測下下期六合彩啦，拎啲慘劇嚟宣傳」、「快啲同林作組隊啦」、「去美國係咪算到日日有槍擊案？」、「諗起個話朋友離世好傷心嘅肥媽，仲走去拍抖音片咁」等。
網民撐：王貽興年頭已經批到凶數係3，好準！
「王貽興年頭已經過過今年要小心女人，女人要小心啲，真係單單都係女人」、「睇大師身光頸靚，點會係搵唔到四圍抽水？」、「大師真係好準」、「大師一早算到3字係凶數，真係準喎」、「大師啲堂二千幾蚊教你咁多嘢，都唔係為賺錢啦，你出去睇下其他啲大師收緊人幾多錢？」
圖片來源：FB＠王貽興