率先直擊首爾蠟像館 睇下邊個最唔似
text – Phoebe photo – Jacy special thanks – 韓國觀光公社
必嚐YG食堂
根據韓國金融監督院公示系統今年3月發布嘅資料，旗下擁有BIGBANG、EPIK HIGH、WINNER等組合嘅YG，去年收入高達1,500億韓圜，比起2年前升幅近34%，不過呢34%似乎都係滿足唔到楊社長，繼去年開拓化妝品市場後，YG喺6月初搵嚟飲食界紅人、有「餐廳神推手」之稱嘅盧嬉映擔任YG Food嘅代表，正式進軍餐飲業，新開嘅烤肉店三岔口豬肉店位於人流極旺嘅弘大區，雖然肉類價錢比同區烤肉店略貴，不過由於開業至今，GD、WINNER及IKON等成員都食過翻尋味，加上店內牆身有BIGBANG、2NE1、Rain、PSY、李昇基簽名，入去食完飯再影張相呃like是常識吧？
粉熊粉熊趣致的臉
有留意開BIGBANG或者YG家族嘅粉絲，相信對呢隻粉藍色嘅YG卡通熊KRUNK唔會陌生，自從GD喺03年嘅個人演唱會上化身熊出沒之後，其一系列嘅產品都非常之暢銷，去年8月，更喺東大門樂天FITIN嘅立體影像公演場Klive內開設Krunk Coffee Project Café，雖然地方唔大，但由牆身到紙杯甚至食物放眼盡是呢隻粉熊，又係呃like位。
https://www.youtube.com/watch?v=AQQTKz9CJ-8
估估下蠟像館
法國Grévin Museum名人蠟像館首次喺亞洲首爾開館，全館高5層，內有80多座蠟像，除韓流始祖張東健、裴勇俊、韓國游泳選手朴泰桓、足球國腳朴智星之外，英國嘅伊麗莎白女王同國家主席習近平都共處一室。假若你係韓迷，請直到1樓，因為Rain、玄彬、GD、PSY、金秀賢嘅蠟像全部收藏於該層，雖則話每座蠟像製作長達半年，製作費亦高達1億韓圜（折合約86,370美元），不過老實講，李敏鎬、朴信惠、金泰希嘅蠟像無論係表情、眼睛同比例都略為失真，但GD嗰個就好出色。
LINE完再KAKAO
雖然位於新沙洞嘅LINE store係好吸引，但筆者更推薦位於江南區三成站COEX Mall內嘅KAKAO FRIENDS專門店，《KAKAO TALK》乃韓國大部分人都使用嘅通訊軟件（對韓迷嚟講應該唔會陌生）。店內嘅周邊商品由文具、手電殼、垃圾桶、香味噴劑甚至連高爾夫球都有，多元化之餘，價錢亦算大眾化，不過最正係店內有齊人咁高嘅卡通公仔，呃like冇難度。
喺KAKAO FRIENDS專門店嘅同一層，有喺韓國非常受小朋友歡迎，而且不時出現喺綜藝節目嘅卡通人物Pororo主題藝術區「Lounge P」，店鋪由café同兒童遊樂區組成，佔地860平方米，內有多個Pororo故事場景，想呃like？又係冇難度。
[…] 去韓國首爾，江南區狎鷗亭新沙洞林蔭道是必逛的吧！那裏除了有Line Friends Café & Store，你知道在10月1日至15日期間，韓劇《奇皇后》男星池昌旭會站在那街上等你來合照嗎？實情是，新沙洞林蔭大道現正進行Trick Art街頭藝術活動，在街上5處地方特設3D立體視覺壁畫，其中1幅便是以池昌旭oppa作招徠。為了跟男神selfie，你能否趕及15號前飛到首爾去？ […]